Batys Qazaqstan oblysynda ótken «Nur Otan» partııasy oblystyq fılıalynyń kezekten tys XXVI konferensııasynda Qazaqstan Respýblıkasy Parlamenti Májilisine kandıdattarǵa daýys berý úshin debat ótkizildi dep habarlaıdy Egemen.kz.
Debat aıaqtalysymen delegattar daýys berý kabınalaryna baryp, Qazaqstan Respýblıkasy Parlamenti Májilisine partııalyq tizimge qatysýshy kandıdattarǵa daýys berdi.
Batys Qazaqstan oblystyq «Nur Otan» partııasy oblystyq fılıaly tóraǵasynyń birinshi orynbasary Murat Muqaevtyń aıtýynsha, konferensııanyń barlyq delegaty daýys berýge qatysqan.
Daýys berý nátıjesinde eń joǵary daýys jınaǵan úsh kandıdat konferensııa sheshimimen Qazaqstan Respýblıkasy Parlamenti Májilisiniń óńirlik kvotasyna sáıkes partııalyq tizimge engizý úshin sezge usynyldy.
Úzdik úshtik – 120 daýys jınaǵan Málik Qulshar, 116 daýys ıesi – Jańabek Jaqsyǵalıev, 109 daýys – Sábıra Súndetova.
Konferensııa barysynda «Nur Otan» partııasynan Batys Qazaqstan oblystyq máslıhatynyń depýtattaryn saılaý boıynsha partııalyq tizim bekitildi. Partııalyq tizimge engizilgen 47 adamnyń kandıdatýrasyn konferensııa delegattary bir aýyzdan qoldady.
Budan keıin bıylǵy 25-qarashada Qazaqstan Respýblıkasynyń Tuńǵysh Prezıdenti - Elbasy, Partııa Tóraǵasy Nursultan Ábishuly Nazarbaevtyń qatysýymen ótetin «Nur Otan» partııasynyń kezekten tys HH sezine qatysatyn batysqazaqstandyq 20 delegattyń tizimi anyqtaldy.
Konferensııa barysynda «Nur Otan» partııasy BQO fılıaly Saıası keńesiniń jańa quramy saılandy. QR Parlamenti Májilisi men barlyq deńgeıdegi máslıhattar saılaýynda partııanyń úgit jumystaryn uıymdastyrý boıynsha oblystyq, qalalyq, aýdandyq saılaýaldy shtabtarynyń quramy jasaqtaldy.
«Nur Otan» partııasynyń oblystyq fılıaly tóraǵasy Ǵalı Esqalıevtiń uıǵarymymen oblystyq saılaýaldy shtabynyń basshysy retinde fılıal tóraǵasynyń birinshi orynbasary Murat Muqaev bekitildi.