Qarala syrmaq
Kóńilimnen aıyǵar syrǵaq-kúdik,
Bala kúndi tolǵansam jyrlap tunyq.
Anam sonda júretin tym asyǵyp,
Oıý salyp, órnektep, syrmaq tigip.
Balalyqtyń ańsadym qulyndy ánin,
Qaıda qaldyń tym tentek julynǵan ún.
«Kelinshek alyp berem» – deıtin anam,
«Qaıtesiń?» – dep surasam «munyń bárin».
Armandaýmen ótkerip tańdy kileń,
Bir qııal kókiregimde jandy bilem.
«Kelinshek alý úshin» – dep oıladym,
О́rnekti syrmaq kerek aldymenen.
Bári de saqtalypty este berik,
Syrmaqtar tigilgen soń kestelenip:
«Kórshiniń kenje qyzyn alyp ber» – dep,
Qıǵylyq saldym bir kún keshke kelip.
Shaǵym ol oılamaıtyn tereńdeı tym,
Qaıǵynyń sezinbegen kereń keıpin.
Úıine barsam ylǵı ákesi de,
«Qyzymdy saǵan ǵana berem» deıtin...
Gúl-balalyq qushaǵyn turady ashyp,
Estýge shat kúlkini qulaq asyq.
Áıteýir jalǵan-shynyn bile almadym,
Anashym keldi bir kún qudalasyp.
Qýanysh ún kóńildi kóterdi asqaq,
Endi bárin kózimmen ótem jasqap.
Júrdim sosyn syrtynan ıemdenip,
Aýylda jigit te joq bóten-bastaq.
Elitip jastyǵymnyń kúı yrǵaǵy
Ańsadym arman jolyn qıyrdaǵy.
Tigilip qansha syrmaq bitse daǵy,
Qaıteıin kórshi qyz da buıyrmady.
Maldanyp beleń bergen jyrǵa qylań,
Keýdemde shertilgenmen syrǵalym án.
«Oljasyz» barǵanymda anashym-aý,
Uıalam sol qarala syrmaǵyńnan.
Jaqsylyq Qazymuratuly
Aýyldyń balasy edim...
Aýyldyń balasy edim, ańǵal edim,
Taǵdyryma kóshirgem tańǵy álemin.
Juldyzdyń aqqanyna tilek aıtyp,
Bir qyzdyń ańsaýshy edim arly ádebin.
Janym ol kez sezimge janshylmaǵan,
Armanym da bar edi taýsylmaǵan.
Taıym qaldy, miniske úıretilmeı,
Qaıyń qaldy, qabyǵy arshylmaǵan.
Kólikke otyrǵan sát, beket baryp,
Kóz aldymda taý qalyp, etek qalyp.
Júgen ustap júgirdiń nesine aǵa,
Jylqyny kete almadym jetekke alyp.
Jazylmas júrek deıtin et shıpamen,
Qalaǵa sap jiberdi shetki úı sálem.
Sońǵy ret balalyqpen duǵa jasap,
Atam jatqan mazarǵa bet sıpap em.
Ýysymda turǵandaı keı tún, álem,
О́leń jazsam – móp-móldir, beıkúnáli em.
Nildiń sýyn bilmeımin, kórgenim joq,
«Kirdiń sýyn baspashy», – deıtin ájem.
Bilemin jer – mekenim, kók – turaǵym,
Nesine kóp tómendep, kóp buǵamyn.
Kirdiń sýyn baspaımyn dep júrgende,
О́zim kirlep ketkendeı bop turamyn.
Nurtas Turǵanbekuly
Báıgetory
Bul joly Báıgetory báıge almady,
Baqyttyń osy shyǵar aınalǵany.
Kómbege buryn jetti kóz aldynda,
Kólbeńdep Kók teńbil at qaı-qaıdaǵy.
Torynyń «taqtan» solaı taıǵany ma?
Qaldy endi bul tirlikte qaı maǵyna?
«Jumabaıdyń júırigi ekinshi alǵan»,
Qudaı-aı, kim senedi jaıǵa myna?!
Jaryqtyq Jumabaıda es qalmady.
Tilegi oryndalmaı tosqandaǵy.
Tóńirek túgel tanyr tulparynyń,
Osylaı ushqany ma bastan baǵy?
Tirlikte tátti bolmas saıran sońy.
Qý kóńil uǵar deısiń qaıdan sony.
Syrtynan Myńbaı synshy kúrsinedi:
«Aldyna qara salmas qaıran, Tory...»
Amal ne ókpe artqanmen ótken kúnge?
Torydan syrt aınalar jetken kúnge.
Aıǵaıshyl, marapatshyl, daýryqpa jurt,
Qaraıdy kózin satyp Kókteńbilge.
Baıaǵy ádetindeı eń bir eski,
Kúnshilder sózge kómip kólgir Esti:
«Tór bermes, toptan ozǵysh Tory atyńdy,
Kókteńbil kók shańyna kómdi» desti.
Halyqtyń teńbilge aýyp bar nazary,
Qorlanǵan janýarda jan-mazaly,
Namysy kókirekte sher bop tunyp,
Aqyry kóz jas bolyp tamdy azaby.
Torynyń kim túsiner ishin tegi?
Belgisiz jelik jurtty isintedi.
Jylqynyń adam qusap jylaǵanyn,
Kórgender tilin bezep músirkedi.
Bul kúıge Tory at qalaı shydar endi,
(Bul qazaq tildep qurtqan Qulagerdi!)
Sol túni ol qorasynan qashyp shyǵyp,
Betke alyp uzaq shapty quba beldi...
Halyqqa daqpyrt daıyn qyryq kúnge,
Iz-túzsiz joqqa aınaldy kúlik múlde.
...Toryny sodan keıin tappady eshkim,
Ketti me, birjolata sińip túnge?
Bilmeımin...
Sherhan Talap