Batys Qazaqstan oblysy úshjyldyq bıýdjetke engizilgen ımıdjdik sharalardy ótkizýden bas tartty. «Nátıjesinde, biz 2020 jyly – 395,4 mln teńge, 2021 jyly – 352,9 mln teńge, 2022 jyly – 356,4 mln teńgeni únemdedik. Únemdelgen 1 mlrd teńgeden astam qarjy óńirdiń ózekti áleýmettik máselelerin sheshýge jumsalady» deıdi oblys ákimi Ǵalı Esqalıev.
Dotasııalyq óńir bolyp sanalatyn Batys Qazaqstan oblysy úshin memlekettik ınvestısııanyń tıimdiligin arttyrý – negizgi basymdyqtyń biri. О́ńir basshysy Ǵalı Esqalıevtiń osy qyzmetke taǵaıyndalǵaly qolǵa alǵan irgeli jumystarynyń biri osy.
– Biz bıýdjet qarjysyn únemdep, tıimdi paıdalanýymyz kerek. Sol úshin bıyldan bastap memlekettik satyp alý jáne qyzmet kórsetý salasyn úshjyldyq qarjylandyrýǵa kóshtik, – degen edi óńir basshysy.
Ákimniń aıtýynsha, munyń birshama tıimdi tustary bar. Máselen, Oral qalasynda beınebaqylaý júıesin ornatý úshin 2,3 mlrd teńge jumsaý josparlanǵan eken. Únemdeý nátıjesinde bul joba oblys bıýdjetine 700 mln teńgege tústi. Munyń ishine júıege úsh jyl qyzmet kórsetý de kiredi.
Bul jerde qarajat qana emes, ýaqyt ta únemdeledi. Merdigerlerdiń jaýapkershiligi artyp, uzaqmerzimdi jáne turaqty kelisimsharttarǵa ıe bolady. Eń bastysy, sybaılas jemqorlyq qaýpi azaıady.
Bıyldyń ózinde «Jastar» stadıony, Servıs jáne jańa tehnologııalar kolledji, protezdik-ortopedııalyq sheberhananyń apatty jaǵdaıda turǵan ǵımaraty, «El yrysy» kommýnaldyq bazary jáne qańǵybas ıtter men mysyqtardy aýlaý qyzmeti jekege berilgen.
Saraptamaǵa qaraǵanda, Memleket basshysynyń pandemııa kezinde usynǵan bıznesti qoldaý sharalarynyń nátıjesinde Batys Qazaqstan oblysynyń 12 myńnan astam kásipkeri 6 mlrd teńgege jýyq qarajat únemdepti.
«Bıznestiń jol kartasy – 2025» memlekettik baǵdarlamasy aıasynda shaǵyn jáne orta bıznes sýbektilerine qoldaý kórsetildi. Nátıjesinde, jyl basynan beri 270 jumys orny qurylyp, 2875 jumys orny saqtalǵan.
«Qarapaıym zattar ekonomıkasy» baǵdarlamasy boıynsha 19 mlrd teńgege 217 joba qarjylandyryldy.
– Prezıdentimiz óz Joldaýynda: «Memleket sharýashylyqty táýir júrgize almaıdy degen qaǵıda aksıomaǵa aınaldy» degen bolatyn. Sol sebepti biz oblys bıýdjeti shyǵyndaryn ońtaılandyrý jáne kásipkerlerge qoldaý jasaý maqsatynda kommýnaldyq nysandardy senimgerlik basqarýǵa berý jumystaryn júrgizý ústindemiz, – deıdi óńir basshysy.
Mysal úshin aıta ketsek, kommýnaldyq «El yrysy» bazaryn alǵan ınvestor 500 mlrd teńge qarajat bólip, bazardyń ınfraqurylymyn rettep jatyr. Sondaı-aq qosymsha taǵy 15 jumys orny ashyldy. Osylaısha jeke sektor – kásipkerler ózderine berilgen múlikti tıimdi paıdalanýmen qatar, odan tıisinshe paıda taýyp, salyq tólep, jumys oryndaryn saqtap otyrǵanyn kórsetedi.
El ishinde túrli pikir aıtylǵanymen, Batys Qazaqstan oblysynda memleket qarajatyn únemdeý sharalarynyń birqatary sport salasyn ońtaılandyrý túrinde kórinis tapty.
– Biz óńirdiń sport salasy qyzmetine tolyq taldaý jasadyq. Sóıtip bıyl dene shynyqtyrý men sport salasy boıynsha 57,5 shtattyq birlik qysqartyldy. Qysqartylǵandardyń 30 paıyzy – ákimshilik qyzmetker bolsa, qalǵany – tehnıkalyq qyzmet kórsetýshi personal. Nátıjesinde, bıyldyń ózinde 28 mln teńgeden astam qarjy únemdeledi. Osy únemdelgen qarajat jattyqtyrýshylardyń nemese ózge de qyzmetkerlerdiń eńbekaqysyn ósirýge, sport uıymdarynyń materıaldyq bazasyn nyǵaıtýǵa josparlanyp otyr, – deıdi Batys Qazaqstan oblystyq dene shynyqtyrý jáne sport basqarmasynyń basshysy Qaımen Esendııarov.
Prezıdent óz Joldaýynda: «Qarjy jetispeýshiligi jaǵdaıynda kásibı sport klýbtaryn tolyqtaı bıýdjet qarajaty esebinen ustaýdyń mańyzdylyǵy joq» degen bolatyn. Batys Qazaqstan oblysynda «Aqjaıyq» fýtbol klýby, «Aqjaıyq» dopty hokkeı klýby jáne voleıbol komandasy sekildi 3 kásibı sport klýby bar. Qazir atalǵan kásibı klýbtardyń bıýdjetin qysqartyp, únemdelgen qarajatty balalar men jasóspirimder sportyn ilgeriletý, buqaralyq sportty damytý, sonyń ishinde aýdan sportynyń qajetine jumsaý qarastyrylyp jatyr.