Ulttyq akademııalyq kitaphananyń uıymdastyrýymen «Sandyq jáne jahandyq ózgerister dáýirindegi oqyrman ult» taqyrybynda Halyqaralyq onlaın oqý Kongresi ótti.
Kitaphana salasynyń barlyq mamanyna, ǵalymdar men qoǵam qaıratkerlerine ulttyq qundylyqtardy, rýhanı-adamgershilik hám mádenı aspektilerdi oqý, saqtaý, qoldaý máseleleri, vırýs pandemııasynan keıingi jahandyq qaıta qurýlar kezeńindegi kitaphanalar jumysynyń baǵyttary boıynsha pikirtalas kezdesýine qatysýǵa múmkindik berý úshin aqparattyq jáne ǵylymı-mádenı onlaın alań qurýdy maqsat tutqan Halyqaralyq oqý Kongresi Mádenıet jáne sport mınıstrliginiń qoldaýymen ótip otyr.
Jıynǵa Qazaqstan Respýblıkasynyń Danııadaǵy Qurmetti Konsýly Leif Midtgaard Pedersen qatysty. Konsýl óz sózinde qazirgi qoǵamdaǵy kitaphanalardyń kitap oqýdy nasıhattaý isindegi úlken rólin atap ótip: «Kitaphana salasynyń mamandary úshin onlaın-aqparattyq platforma qurý jónindegi osy bastamany alǵa basqan ıgi qadam dep sanaımyn. Tarıhtan sabaq alýǵa múmkindik beretin ulttyq qundylyqtar men mádenı aspektiler osy prosestiń negizi bolýǵa tıis. Osy onlaın platforma keleshek urpaqtyń ıgiligi úshin jasalatyn joba bolady», dedi.
Qazirgi ýaqytta kitaphana jumysyn vırtýaldy oqyrmanǵa da qoljetimdi qylý – kitaphana aýdıtorııasynyń álemdik standartqa saı bolýynyń alǵysharty ispettes.
Qazaqstandaǵy halyqaralyq oqý Kongresine alǵash ret qatysqan halyqaralyq kitaphanalyq qaýymdastyqtar men mekemeler Federasııasynyń (IFLA) prezıdenti Krıstın Makkenzı pandemııaǵa baılanysty aqparattyq qoǵamdastyqtaǵy jańa ózgerister kezeńindegi IFLA jumysy týraly hám saýattylyq pen oqýdy álemdik aýqymda ilgeriletýdiń mańyzdylyǵy jaıynda baıandama jasady.
Sondaı-aq atalǵan sharaǵa Reseı, Qytaı Halyq Respýblıkasy, Majarstan, Túrkııa, Latvııa, Danııa, Birikken Arab Ámirlikteriniń ulttyq jáne basqa da kitaphanalarynyń mamandary qatysty.