Búgin oblys ákimi Gúlshara Ábdiqalyqovanyń tóraǵalyǵymen ınvestısııalyq jobalar boıynsha májilis ótti. Memlekettik organ ókilderi men ınvestorlar qatysqan jıynda eksportqa baǵyttalǵan 2 joba tanystyrylyp, júzege asyrýshy kompanııa quryltaıshylarymen memorandýmǵa qol qoıyldy.
"Eki joba da salaǵa jańa serpin beredi dep sanaımyn. Paıdalanylǵan sýdy ekinshi ret qaıta qoldaný jáne jańbyrlatyp, tamshylatyp sýǵarý ádisin engizý arqyly biz ártaraptandyrýǵa baǵyttalǵan jumystarymyzdy jetildire túsemiz. Sondyqtan, bul baǵyttaǵy egin ornalastyrý kólemi men mal azyqtyq daqyldar úlesi ulǵaıtylatyn bolady. Usynylyp jatqan jobalardy qoldap júzege asyrýymyz qajet", - dedi Gúlshara Ábdiqalyqova.
Birinshi joba – «Qyzylorda AGRO PLUS» JShS-niń «Jańaqorǵan aýdanynda tamshylatyp sýarý ádisimen 3 myń ga jerge óndiristik negizde qyzanaq daqylyn ósirý» jáne kýattylyǵy jylyna 15 myń tonnalyq konsentrlengen qyzanaq pastasyn óndiretin zaýyt qurylysyn ınvestısııalaý jobasy. Quny 26,8 mln eýro bolatyn jobany júzege asyrý barysynda 500-ge deıin jumys ornyn ashý kózdelýde. Qazaqstannyń túrli oblystarynda qoıyltylǵan tomat pastasyn óndirý boıynsha tolyq sıkldi zaýyt qurýdy kózdeıtin bastama quryltaıshysy «Orbis Agro» kompanııasy.
Ekinshi joba aıasynda Shıeli aýdanynda paıdalanylǵan aǵyn sýdy qaıta qoldaný arqyly jańbyrlatý tásilimen 10 myń gektarǵa jońyshqa egý qolǵa alynady.
Oblys ákimi jaýapty sala basshylaryna zaýyttar úshin ınfrastrýktýrasy qamtylǵan jer ýchaskelerin belgileýdi, qajetti ınjenerlik-ınfraqurylym júıelerin júrgizýdi, ındýstrııalandyrý kartasyna engizýge óńirlik úılestirý keńesinde jedeldetip qaraýdy jáne atalǵan ınvestısııalyq jobalardyń tolyq iske asyrylýyn qamtamasyz etýdi tapsyrdy.