Qazaqstanda Porsche Taycan – Porsche kompanııasynyń alǵashqy tolyq elektrlik sporttyq avtokóligi satyla bastady. Taycan prezentasııasy ótken jyldyń kúzinde Soltústik Amerıkada, Qytaıda jáne Eýropada bir ýaqytta ótti jáne 2019 jylǵy álemdik premeralardyń biri atandy. Búgingi kún jaǵdaıyndaǵy sebepter boıynsha elektr sportkarynyń alǵashqy partııalaryn Qazaqstanǵa jetkizý birshama kidirgenimen, bul jaıt otandyq avtonaryq úshin jarqyn oqıǵanyń mańyzdylyǵyn tómendetpeıdi deıdi kólik naryǵyn zertteýshiler.
«Koronavırýstyq pandemııaǵa baılanysty Germanııadaǵy Porsche zaýyty óndiristi bir aıǵa toqtatýǵa májbúr boldy. Osy sebeptermen Qazaqstanda Taycan satylymynyń bastaý merzimin aýystyrýǵa týra keldi. Sondyqtan da búgin biz búkil álemniń avtomobıl súıer qaýymyn 70 jyldan astam ýaqyt boıy tánti etken brend úshin revolıýsııalyq modeldiń endi QR-da da resmı túrde usynylǵanyna eki ese qýanyshtymyz», - dep málimdedi Porsche-niń Qazaqstandaǵy resmı ımporttaýshysy Orbis Auto avtomobıl tobynyń bas dırektory Dınara Ysqaqova. Porsche Taycan – bul ádettegi 400 volt elektromobıldiń ornyna júıe kerneýi 800 voltti quraıtyn birinshi serııalyq avtokólik. Bul sheshim Taycan júrgizýshisine jolda aıtarlyqtaı artyqshylyqtar beredi: sapar boıy joǵary qýat jáne zarıadtaý jyldamdyǵy. Bes mınýt ishinde arnaıy stansııada turaqty toqpen zarıadtaý sizge 100 km-ge jetý úshin jetkilikti qýatty jınaýǵa múmkindik beredi. Idealdy jaǵdaıdaǵy zarıadtaý ýaqyty 5-ten 80 paıyzǵa deıin 22,5 mınýtty quraıdy, maksımaldy zarıadtaý qýattylyǵy (eń joǵary) – 270 kVt. Joǵary tıimdi Plus batareıasynyń jalpy syıymdylyǵy – 93,4 kVt/saǵ. Taycan júrgizýshileri óz kóligin úıde aınymaly toq kózinen 11 kVt-qa deıingi qýatpen zarıadtaı alady. Turaqty magnıtterden qozatyn sınhrondy elektr qozǵaltqyshtary avtomobıldiń aldyńǵy jáne artqy osterine ornatylǵan, tıimdiligi joǵary batareıa túbine ornalastyrylǵan. Bul tujyrymdama keremet júris sapasyn, uzaq qýatty, yqsham dızaındaǵy joǵary PÁK-ti, dınamıka men únemdiliktiń úılesimin qamtamasyz etedi. Innovasııalyq prınsıpterdi qoldana otyryp, tejeý energııasyn 90%-ǵa deıin regenerasııalaýǵa múmkindik beretin Porsche Recuperation Management rekýperasııany basqarý júıesi jumys isteıdi. Tejeý kezinde aldymen rekýperasııa rejımi, sodan keıin kúshti báseńdeý qajet bolsa mehanıkalyq tejegishter iske qosylady. 200 km/saǵ jyldamdyqtan tolyq toqtaǵanǵa deıingi báseńdeý kezinde rekýperasııa 4 shaqyrym júrýge jetkilikti elektr energııasyn únemdeýge múmkindik beredi. Taycan Turbo S nusqasy Launch Control iske qosylǵan kezde Overboost rejıminde 560 kVt (761 a.k.) deıingi qýatqa ıe, al Taycan Turbo qýaty 500 kVt (680 a.k.) quraıdy. Taycan Turbo S ornynan 100 km/saǵ deıin 2,8 sekýndta, al Taycan Turbo 3,2 sekýndta qarqyndaı alady. Turbo S modeliniń júris qory 412 shaqyrymǵa deıin, al Turbo modelinde 450 shaqyrymǵa deıin (eki jaǵdaıda da WLTP sáıkes). Eki tolyq jetekti modeldiń maksımaldy jyldamdyǵy 260 km/saǵ quraıdy. Porsche Taycan 4S «júzge» 4 sekýndta jetedi, kóliktiń maksımaldy jyldamdyǵy 250 km/saǵ, qýaty 390 kVt (530 a.k.). Porsche Taycan-ǵa alǵash ret terini paıdalanbaı jasalǵan árleý nusqasyn usynady. Innovasııalyq qaıta óńdelgen materıaldan jasalǵan árleý bólshekteri sporttyq mashınanyń utymdy tujyrymdamasyn kórsetedi. Eki júksalǵysh bar: aldyńǵysynyń kólemi 81 lıtr, artqy – 366 lıtr. 2020 jyly Qazaqstanda Taycan 4S, Taycan Turbo modıfıkasııalary qoljetimdi bolady; 2021 jyly modeldik qatar Taycan 4 jáne Taycan Turbo S, Taycan Gran Turismo tolyqtyrylady. Taycan 4S jáne Taycan Turbo modeli qara jáne aq tústerde, metall effektindegi 11 túste, sonymen qatar eksklıýzıvti kók metall, sur metall, ashyq sur jáne qyzyl metall emes tústerde bolady. Porsche avtosalonynyń dırektory Gaýhar Ǵabdrahımovanyń aıtýynsha, COVID-19 pandemııasymen baılanysty qıyndyqtarǵa qaramastan, brendtiń qazaqstandyq satylymy 2020 jyly ósimdi kórsetti. «2020 jyldyń birinshi jartysynda Porsche satylymy ótken jyldyń sáıkes kezeńimen salystyrǵanda 26%-ǵa artty: 2019 jyldyń qańtar-maýsym aılarynda resmı ımporttaýshy Qazaqstanda 34 avtomobıldi, al osy jyldyń alty aıynda 43 avtokólikti satty. 2019 jyldyń 10 aıynyń qorytyndysy boıynsha 58 avtokólik óz ıelerin tapty, al bıyl karantınge qaramastan, biz 93 Porsche kóligin sattyq. Taycan-nyń qazaqstandyq satylymdary bizdiń úmitimizdi aqtaıdy dep senemiz. Sonymen qatar, 2020 jyldyń sońynda biz Porsche-niń taǵy bir jańalyǵyn – jańartylǵan Panamera GII kútemiz», - dedi Gaýhar Ǵabdrahımova. Taycan 4S baǵasy komplektasııasyna baılanysty 100 myń eýrodan, al Taycan Turbo 145 myń eýrodan bastalady. Búgingi tańda Qazaqstanda Porsche-niń úsh elektrkary satyldy, jyl sońyna deıin resmı dıler taǵy bir Taycan satýdy josparlap otyr, 2021 jylǵa arnalǵan satý jospary – 15 avtokólik.