Almatyda «Nev Names» pen «Daryn» promoýterlik kompanııalarynyń uıymdastyrýymen kásipqoı bokstan halyqaralyq týrnır ótti, dep habarlaıdy Egemen.kz.
Bul jarysta Qazaqstan, Ázirbaıjan jáne О́zbekstannan kelgen bylǵary qolǵap sheberleri kúsh synasty.
Sharshy alańǵa 12 jup shyqty. Solardyń arasynan tórt jerlesimizdiń óneri erekshe áser qaldyrdy. Atap aıtsaq, 66,6 kılo salmaqta óner kórsetken atyraýlyq Bekbolat Quramysov Almaty oblysynyń ókili Oljas Tursynbaımen kezdesti. Qazaqstan Respýblıkasyna eńbek sińirgen jattyqtyrýshylar Dastan Sádýaqasov pen Sársenbaı Torǵaevtan tálim-tárbıe alǵan aıtýly boksshynyń stýdentter arasyndaǵy álem chempıonatynyń eki dúrkin fınalısi jáne Azııa birinshiliginiń qola júldegeri degen ataqtary bar. Kezinde Bekbolat «Astana arlandary» sapynda judyryqtasqany da jadymyzda. Osyndaı úlken mektepten ótken saqa sportshyǵa kásipqoı rıngtegi tusaýkeser kezdesýin ótkizgen Oljasty utý aıtarlyqtaı qıyndyq týǵyzǵan joq. Quramysov qarsylasyn asa aýyr soqqylardyń astyna alǵannan soń tóreshi jekpe-jekti úshinshi raýndta toqtatty.
63,5 kılo salmaq dárejesindegi Baýyrjan Beıildınovtiń de óneri jaqsy áser qaldyrdy. Almaty oblysy Ile aýdanynyń atynan shyǵyp júrgen jas jigittiń jekpe-jegin buǵan deıin de tamashalaǵan edik. Tusaýkeser kezdesýinde ol qarsylasyn ekinshi raýnda esinen tandyrǵan edi. Baýyrjan bul joly da sol baǵytynan jańylǵan joq. Ol Jetisý óńiriniń taǵy bir túlegi Aqjol Nurdýndy báseke bastalǵan bette búıirden uryp sulatyp saldy.
Bir shoǵyr sańlaqtardy tárbıelegen tanymal bapker Saǵatbek Musahanovtyń da shákirtteri osy jarystar jasyndaı jarqyrady. Kóptegen boks keshterinde óner kórsetip, jankúıerler júregin jaýlap úlgergen jeńil salmaqtaǵy Eskendir Harsanalty raýndtyq básekede Erjan Jasulandy jeńdi. Onyń taktıkalyq ta, tehnıkalyq turǵydan da qarsylasynan sheberlik deńgeıi bir bas joǵary ekeni kózge anyq uryp turdy. Orta salmaqtaǵy Ǵanı Spataev (79,7 kılo) tájikstandyq Abývahıt Rahmatýllaevty aıqyn basymdyqpen utty.