Efıopııadaǵy azamattyq soǵys toqtaıtyn túri joq. Nátıjesinde, el aýmaǵynda ornalasqan bosqyndar lagerine jol jabylyp, ondaǵy azamattardyń kúnkórisi nasharlap ketti.
Keshe BUU Efıopııa úkimetine eldegi 4 lagerge aparar joldy ashýdy tapsyrdy. Memlekettegi shıelenis saldarynan gýmanıtarlyq kómekke zárý toppen baılanys úzilgen. Olar birneshe aıdan beri esh kómek ala almaı keledi.
BUU-nyń bosqyndar máselesi boıynsha Efıopııadaǵy ókili Enn Enkontr «Gýmanıtarlyq kómekti jetkizý qıyndap ketti. Bosqyndarmen baılanys úzilip, shamamaen 100 myń erıtreıalyq azyq-túliksiz qaldy», deıdi.
Azyq-túlik jetkizýdi bylaı qoıǵanda, keıingi kúnderi olardan habar alý da múmkin bolmaı ketken. «Bizdiń baılanyspaǵanymyzǵa 2 kúnnen astam ýaqyt ótti. Jaǵdaıdy túzeýdi, bosqyndarmen baılanystyrýdy suraımyz», deıdi E.Enkontr.
BUU deregine nazar salsaq, 2018 jyldan beri 507 myńǵa jýyq erıtreıalyq elinen ketken. Bul degenimiz – jalpy halyqtyń onnan bir bóligi.
Halyqaralyq uıymdar olardyń Efıopııaǵa jaıǵasqanyn qup kórdi. О́ıtkeni mundaǵylarmen tili uqsas, salty bir. «Qalypty ómirin kúrt ózgertý de lagerlerge aýyr soqqy. Sondyqtan óz memleketine meılinshe jaqyn memleketterde lager qurý bosqyndar úshin tıimdi», deıdi BUU ókilderi. Al endi Efıopııanyń Tıgraıan eldi mekeninde azamattyq soǵys júrip jatyr. Efıopııa úkimeti tıgraıandyqtarǵa qarsy etnostyq qysym baryn joqqa shyǵaryp, eldegi shıelenisti túsinbeýshilikke balady. Keı málimetterge súıensek, Efıopııa úkimeti lagerdegi bosqyndardy da soǵysqa úgittegen. Bosqyndar «Erıtreıa men Efıopııada eshqashan tynyshtyq ornamaıdy», dep kúrsinedi.