Karantın kezinde tabysynan aıyrylyp, kásibi kómeski tartqan iri kásiporyndar ǵana 6 mlrd teńgege deıin jeńildetilgen nesıe berilmek. Bul týraly Ulttyq Bank habarlap, jeńildetilgen nesıeni alatyn sýbektiler tiziminiń keńeıgenin málimdedi, - dep jazady Egemen.kz
Ulttyq bank pen Ulttyq ekonomıka mınıstrligi birlese otyryp, qyzmet kórsetý, óńdeýshi ónerkásip salasyndaǵy iri kásiporyndar tizimin bekitken. Tártip boıynsha, bir kásiporynǵa beriletin shekti nesıe kólemi – 6 mlrd teńge. Orta jáne shaǵyn bıznes úshin shekti mólsher 3 mlrd teńgeden aspaý kerek bolsa, jeke kásipkerler 50 mln teńgeden artyq nesıe ala almaıdy.
Tótenshe jaǵdaı kezinde zardap shekken agroónerkásip kesheni kásipkerleri men iri kásipkerlik sýbektilerin nesıeleý úshin qosymsha 200 mlrd teńge bólinipti. 200 mlrd teńgeniń 100 mıllıardy agroónerkásip kesheni úshin shekti mólsher bolyp bekitilgen. Onyń 70 mıllıardy ekinshi deńgeıli bankter arqyly, 30 mıllıardy «Agrarlyq nesıe korporasııasy» AQ arqyly berilmekshi. Tizimniń keńeıýine baılanysty baǵdarlama ataýy kásipkerlik sýbektilerin jeńildikpen nesıeleý baǵdarlamasy bolyp ózgergen. Bólingen qarajat 2021 jyldyń 31 naýryzyna deıin ıgerilýi tıis.
Ulttyq Bank usynǵan málimet boıynsha, dál qazirgi sátte ekinshi deńgeıli bankter 567,4 mlrd teńgege 2311 ótinishti maquldaǵan. 1370 shaǵyn jáne orta bıznes sýbektisine 455,3 mlrd teńge bólinipti. Onyń 101,6 mıllıardy buryn berilgen nesıelerdi qaıtarý qarajatynan alynǵan. Bólingen qarajattyń kóp bóligi – saýda (319 mlrd), qurylys (44,9 mlrd) jáne óńdeýshi ónerkásiptiń (39,8 mlrd) enshisinde.
Abaı Aımaǵambet,
"Egemen Qazaqstan"
Almaty