Almatyda Tuńǵysh Prezıdent kúnine arnalǵan "Men jastarǵa senemin!" VIII Respýblıkalyq jastar forýmynyń jeńimpazdaryn marapattaý rásimi ótti. Bıylǵy jyly ınnovasııa jáne shyǵarmashylyq, jasampazdyq prızmasy arqyly patrıotızmdi damytýǵa baǵyttalǵan baıqaý onlaın formatta uıymdastyrylǵan bolatyn, dep habarlaıdy Egemen.kz.
Ál-Farabı atyndaǵy Qazaq Ulttyq ýnıversıteti respýblıkalyq jastar forýmyn Tuńǵysh Prezıdent kúnine arnap 2013 jyldan beri ótkizip keledi. Bıyl shara sáýir aıynan bastaý alyp álemdik pandemııaǵa baılanysty onyń barlyq kezeńderi onlaın rejimde ótti. Dástúrli forýmǵa qatysýshylar bıyl "Men óz elimniń órkendeýi úshin ne isteı alamyn" taqyrybynda úzdik esse, "Elimizdiń ınnovasııalyq damýyna qosqan naqty úlesim" atty úzdik ınnovasııalyq joba, "Men jastarǵa senemin!" azamattyq-patrıottyq baǵyttaǵy poezııalyq shyǵarma jáne "Máńgilik el muratym!" avtorlyq patrıottyq ánder, "Sanaly urpaq" parasattylyq prınsıpterin nasıhattaıtyn úzdik joba atalymdary boıynsha baq synady.
El stýdentteri asyǵa kútetin forým nomınasııalarynyń tizimi jyl saıyn jańaryp keledi. Ábý Nasyr Ál-Farabıdiń 1150 jyldyǵy men Eriktiler jylynda baıqaýdy «Qaiyrymdy qoǵam» stýdenttik jobasy tolyqtyra tústi. Sonymen qatar, forýmnyń men_jastarga_senemin_kaznu ınstagram-akkaýntynyń oqyrmandary men kórermender anyqtaıtyn «Kórermender kózaıymy syılyǵy» nomınasııasy taǵaıyndaldy. Forýmǵa qatysý úshin elimizdiń barlyq aımaqtarynan bes myńǵa jýyq stýdent tirkelgen. Shyǵarmashylyq jobalar men beıne prezentasııalardy bedeldi sarapshylar – qoǵam qaıratkerleri, bıznes ókilderi, memlekettik organdar, mádenıet jáne óner qaıratkerleri men ǵalymdardan jınalǵan táýelsiz qazylar alqasy baǵalady. Nátıjesinde 300 úzdik joba sońǵy týrdyń fınalyna ótti. QazUÝ rektory Ǵalym Mutanov forýmnyń fınalısterin quttyqtap, jas zııatkerler táýelsiz Qazaqstannyń bolashaǵy ekenin atap ótti.
– Naq osy jas urpaqtyń aldynda jasampaz ister estafetasyn jalǵastyrý jáne eldiń órkendeýin qamtamasyz etý mindeti tur. Mundaı mıssııany tek patrıotty, deni saý jáne adamgershilik turǵyda básekege qabiletti jáne áleýmettik jaýapty jastar ǵana júzege asyra alady. Sondyqtan árbirińiz eń aldymen, óz otbasyńyzdyń jáne eń bastysy, óz Otanyńyzdyń aldyndaǵy úlken jaýapkershilikti durys uǵynyp, túsinip, sezinýlerińiz kerek! Forým sizder úshin jańa jetistikterge bastaý bolady dep úmittenemin, – dedi akademık Ǵ.Mutanov.
Baıqaýda dara shyqqan daryndy shákirtter baǵaly syılyqtarmen marapattalady. Sondaı-aq júzden júırik dep tanylǵan jeńimpazdar QazUÝ-da bir jyl tegin oqý grantyna ıe boldy. Úzdik stýdenttik ınnovasııalyq joba baıqaýynda E.Bóketov atyndaǵy QarMÝ-den kelgen Pavel Ivachev jeńiske jetti. Qazylar alqasy Sh.Ýálıhanov atyndaǵy Kókshetaý ýnıversıtetinen kelip baq synaǵan Qýandyq Serikovtyń jumysyn úzdik esse dep tanydy, al poetıkalyq shyǵarmalar boıynsha H.Dosmuhamedov atyndaǵy Atyraý memlekettik ýnıversıtetiniń stýdenti Nurjol Jaqsylyqtyń týyndysy sýyrylyp alǵa shyqty. A.Baıtursynov atyndaǵy Qostanaı memlekettik ýnıversıtetiniń ókili Nıkolaı Iаroshenko avtorlyq patrıottyq án baıqaýynda kósh bastasa, S. Amanjolov atyndaǵy ShQMÝ-dyń stýdenti Dıdar Jarqyn «Sanaly urpaq» parasattylyq qaǵıdattaryn ilgeriletý jobasymen úzdik dep tanyldy. «Qaiyrymdy qoǵam» stýdenttik qaıyrymdylyq jobalar baıqaýynda Qazaq ulttyq qyzdar pedagogıkalyq ýnıversıtetiniń stýdenti Dılıara Nadyrhanova jeńiske jetti. Talantty jas kompozıtor Rahat-Bı Ábdisaǵın uly oıshyl ál-Farabıdiń mereıtoıyna arnap fortepıano men sımfonııalyq orkestrge jazǵan «Qubylys» atty sımfonııalyq poemasy úshin forýmnyń arnaıy dıplomymen marapattaldy.
Respýblıkalyq forýmdy uıymdastyrýshy – ál-Farabı atyndaǵy QazUÝ nomınasııa laýreattary men baıqaýlardyń alǵashqy úsh oryn ıegerlerine kelesi jyly ýnıversıtette ótetin jazǵy kóshbasshylyq mektebine qatysýǵa múmkindik berdi. «Men jastarǵa senemin!» VIII respýblıkalyq jastar forýmynyń jeńimpazdaryn saltanatty marapattaý rásiminiń translıasııasyn AlFarabiTV YouTube arnasynan kórýge bolady.