Jaqynda Bilim jáne ǵylym mınıstrligi men «Daryn» ǵylymı-praktıkalyq ortalyǵynyń bastaýymen HHI respýblıkalyq Abaı oqýlary ótken bolatyn. Aqynnyń 175 jyldyq mereıtoıyna oraı uıymdastyrylǵan baıqaýǵa kileń ozat oqýshylar qatysyp, uly aqynǵa qurmet kórsetken-di. Osy jarysqa qatysqan jetisýlyq Aıgerim Senbaeva júldeli ekinshi oryn aldy.
Aıgerim Eńbekshiqazaq aýdanyna qarasty Báıterek orta mektebiniń 10-synybynda oqıdy. О́ziniń ádebıetke qushtarlyǵyn bastaýysh synyptan-aq baıqatqan ol buǵan deıin halyqaralyq Mahambet, Muqaǵalı oqýlaryna qatysyp, bas júlde enshilgen eken.
– Segizinshi synypta oqyp júrgende ustazym Gúlnur Saǵyndyqova apaı «Sen Abaı topyraǵynda týǵan qyzsyń, uly aqynnyń shyǵarmashylyǵyna tereń boılaýyń kerek. Danalyq darııasyna qulash urýǵa daıyndal» dedi. Osy sóz qamshy bolyp, Abaı atanyń óleńderin, qanatty sózderin oqı bastadym. Alǵashqyda mánerlep oqyp júrdim, kele-kele múdirmeı jatqa aıtatyn boldym. Al «Qara sózderin» oqyǵan saıyn oı tereńine jeteleı beretindigine tánti bolǵan soń qyzyǵýshylyǵym tipti arta tústi. Uly aqynnyń óleńderin, poemasyn, qara sózderin oqı otyryp, zamandastaryma odan ómirlik taǵylym alýǵa bolatynyn jetkizgim keledi, – deıdi Aıgerim.
Onynshy synyptyń oqýshysy qazir Abaı Qunanbaıulynyń 180 óleńin, 5 qara sózin, 2 poemasyn tolyqtaı jatqa biledi eken. Aıtpaqshy, ol jaqynda oblystyq bilim basqarmasy men «Jetisý daryny» ortalyǵynyń uıytqy bolýymen ótken Beısen Quranbek atyndaǵy oblystyq olımpıadada júldeli 2-oryndy ıelendi.
Almaty oblysy