Ortalyq saılaý komıssııasy Nur Otan, Adal «Aq jol» jáne Qazaqstan halyq partııasy partııalary Parlament Májilisi depýtattyǵyna úmitker kandıdattardyń tizimin ótkizgenin habarlady.
«Qazaqstan Respýblıkasyndaǵy saılaý týraly» Konstıtýsııalyq Zańynyń 87 jáne 89-babtaryna sáıkes, saıası partııalar saılaý komıssııasyna óz úmitkerleriniń tizimin jáne qajetti qujattardy usynǵan. Qujattar qatarynda saıası partııanyń joǵarǵy organynyń partııalyq tizimdi usyný týraly hattamasynan úzindi kóshirme, partııa ókiliniń ókilettikterin rastaıtyn qujat, elektrondy jáne qaǵaz nusqadaǵy partııalyq tizim, azamattyń partııalyq tizimge engizýge kelisimi týraly ótinishi, tizimge engen árbir kandıdattyń ómirbaıany, kandıdat pen onyń jubaıynyń kiristeri men múlki týraly deklarasııalar tapsyrǵany týraly memlekettik kiris organynyń anyqtamasy bar.
Ortalyq saılaý komıssııasy partııalyq tizimderge engen kandıdattardyń Qazaqstan Konstıtýsııasynda jáne «Qazaqstan Respýblıkasyndaǵy saılaý týraly» zańda kórsetilgen talaptarǵa sáıkestigin tıisti organdarǵa suraý salý arqyly anyqtaıtyn bolady.
Parlament Májilisiniń depýtattaryn saılaý jónindegi kúntizbelik josparǵa sáıkes, saıası partııalar úmitkerler tizimin 30 qarasha saǵat 18.00-ge deıin ótkize alady. Al partııalar bergen tizimderdi tirkeý 10 qarashadan bastalyp, 10 jeltoqsan kúni saǵat 18.00-de aıaqtalady.