Taıaýda Reseıdiń «Sport-Ekspress» gazetiniń saıtynda Qurlyqtyq hokkeı lıgasynda (QHL) eń kóp eńbekaqy alatyn oıynshylardyń tizimi jarııalandy. Baı-aýqattylar qatarynda 27 jastaǵy «Barystyń» tasqamal qorǵaýshysy Darren Dıs te bar. Joǵaryda atalǵan tizimde ol 9-oryndy ıelendi, - dep jazady Egemen.kz
Darren Dıs Kanadanyń Alberta provınsııasynyń Medısın-Hat dep ataltyn shaǵyn qalasynda dúnıe esigin ashty. О́ziniń sporttyq karerasynyń alǵashqy kezeńderin ol «Monreal Kanadıenstiń» Amerıka hokkeı lıgasyndaǵy (AHL) óner kórsetetin «Gamılton Býldogs» pen «Sent-Djons Aıskeps dep atalatyn farm-klýbtarynda bastady. Ishki birinshilikte kózge túsip, qyraǵy mamandar nazaryn birden ózine aýdardy. Sodan 2015-2016 jylǵy maýsymdy Ulttyq hokkeı lıgasynda (UHL) ótkizdi. Biraq Dıs «Monreal Kanadıenste» kóp turaqtaǵan joq. Kóp uzamaı aıtýly qorǵaýshy AHL-ǵa qaıta oraldy.
2017 jyly Darren Qazaqstanǵa qonys aýdaryp, «Barystyń» jeıdesin kıdi. Kelgen bette ol aıqyshty óner kórsetip, elordalyq jankúıerlerdiń súıikti oıynshylarynyń birine aınaldy. Onyń negizgi amplýasy qorǵaýshy bolǵanymen, Dıs óz mindetin múltiksiz atqaryp qana qoımaı, jıi-jıi shabýyldarǵa da aralasyp turady. Kanadalyq legıoner san márte ońtaıly pas berip, mańyzdy goldar soqqanyn da kózimiz kórdi. 2019 jyly Qazaqstannyń azamattyǵyn alǵan Darren sol kezden beri ulttyq qurama komandamyzdyń sapynda óner kórsetýde.
Darren Dıstiń qol jetkizgen tabystaryna keler bolsaq, ol 2019 jyly Qazaqstan quramasy sapynda álem birinshiliginde («A» dıvızıony) birinshi oryn aldy. Sol jarystyń shartty quramasyna endi. Qatarynan eki jyl boıy QHL-dyń «Juldyzdar matchynda» oınady. Kanadalyq qorǵaýshy jylyna 75 mıllıon rýbl (421 mıllıon teńge nemese 999 myń AQSh dollary) mólsherinde jalaqy alady eken.
Bul tizimde Máskeýdiń «Dınamo» klýbynyń qos oıynshysy kósh bastap tur. 33 jastaǵy shabýylshy Vadım Shıpachevtiń jyldyq jalaqasy 120 mıllıon rýbldi qurasa, 27 jastaǵy surmergen Dmıtrıı Iаshkın 95 mıllıondy qaltaǵa basady. Úshinshi jáne tórtinshi oryndardy Ýfanyń «Salavat Iýlaevy» sapynda jasyndaı jarqyrap júrgen 30 jastaǵy Sýomı eliniń ókili Teemý Hartıkaınen men Ekaterınbýrgtiń «Avtomobılıst» klýbynyń 32 jastaǵy chehııalyq qaqpashysy Iаkýb Kovarj ózara bólisýde. Olardyń árqaısysy 95 mıllıonnan ıemdenýde. Sondaı-aq, QHL-da eń kóp eńbekaqy alatyn hokkeıshiler qatarynda kandalyq Djastın Azevedo men shvesııalyq Anton Lander (85 mln.) jáne danııalyq Fılıp Larsen men fınlıandııalyq Iýha Metsola (80 mln.) syndy sańlaqtar bar.
Bir jyldyq jalaqasy dál Darren Dıstikindeı 75 mıllıon rýbldi quraıtyn taǵy alty oıynshy bar. Olar – Alekseı Marchenko (Reseı, «Lokomotıv» Iаroslavl), Andre Petersson (Shvesııa, «Lokomotıv» Iаroslavl), Sergeı Plotnıkov (Reseı, «Metallýrg» Magnıtogorsk»), Magnýs Pıaıarvı (Shvesııa, «Dınamo» Máskeý), Anton Slepyshev (Reseı, SSKA Máskeý) jáne Vladımır Tkachev (Reseı, «Lokomotıv» Iаroslavl).