Jýyrda ǵana Shymkentte aıaqtalǵan Qazaqstan chempıonatynda erekshe kózge túsken boksshylardyń biri Ertýǵan Zeınýlınov. 63 kılo salmaq dárejesinde synǵa túsken 23 jastaǵy jalyndy jas barlyq qarsylasynan basym túsip, bas júldeni oljalady. Osy jarystyń kýási bolǵan bilikti bapkerlerden bastap, kógildir ekranǵa kóz tikken kórermenderdiń barlyǵy da aıtýly bylǵary qolǵap sheberiniń ónerin joǵary baǵalady, dep habarlaıdy Egemen.kz.
Ertýǵan óziniń týyp-ósken jeri – Almaty oblysy Qaratal aýdanynyń Úshtóbe qalasynda bokstyń qyr-syryna qanyqty. Jer jannaty – Jetisýda Almas Jyńǵylbaevtyń qol astynda jattyǵyp, tyrnaqaldy tabystaryna qol jetkizdi. Sol kezdegi onyń eń iri jetistigi – Bangkokta ótken jastardyń Azııa birinshiliginiń qola júldesi. О́z qurdastary arasynda Zeınýlınov basqa da dodalarda daralandy. Eseıe kele Almatydaǵy Qazaqtyń Sport jáne týrızm akademııasyna oqýǵa túsip, ol jerde Qaırat Kármenovten tálim-tárbıe aldy.
Aıtýly boksshynyń alǵash ret jaryq etip kózge túsken tusy – 2016 jyly Tájikstannyń bas shahary – Dýshanbede uıymdastyrylǵan stýdentter arasyndaǵy Azııa birinshiligi. Sóz oraıy kelgende, Qazaqstan Respýblıkasyna eńbek sińirgen jattyqtyrýshy Dastan Sádýaqasovtyń komanda jasaqtaýda qyraǵylyǵyn erekshe atap ótken jón. Jas bolsa da, bas bolǵan aıtýly maman esimi kópshilikke beımálim boksshyny el quramasyna qosty. Pamır taýynyń eteginde Zeınýlınov senimdi aqtap, kúmis medaldi oljalady. Arada eki-úsh aı ótkennen soń Taılandtyń Chıang-Maı qalasynda stýdentterdiń álem chempıonatynyń jalaýy jelbiredi. Bul jarysta Ertýǵan qola júldeni qorjynǵa saldy.
Joǵarydaǵy jaǵdaı jas jigitti qanattandyrdy. Shymkentte uıymdastyrylǵan el chempıonatynda ol ózin jaqsy qyrynan kórsetti. Bastapqy básekelerde qarsylastaryn esh qınalmaı utqan Ertýǵan jartylaı fınalda Azııa birinshiliginiń kúmis júldegeri Zákir Safıýllınge ese jiberdi. Bul jeńiliske bola 20 jastaǵy jigitti eshkim sókpedi. О́ıtkeni, qarsylasy tam azýly edi. 31 jastaǵy Zákirdiń 60 kılo salmaqta elimizdiń birinshi nómirli boksshysy ekenin jurt jaqsy biledi. Kerisinshe, onyń saqa sportshyǵa laıyqty qarsylyq kósetkenine kúsh-jigeri jetkenine bapkerleri de, basqalar da rıza boldy. Shymkent saparynan qola medalmen oralǵan Zeınýlınov ulttyq qurama sapyna qabyldandy.
– Respýblıkamyzdyń barlyq óńirinen jınalǵan bylǵary qolǵap sheberleri bas qosqan jarysta úzdikter sanatyna qosylǵannan keıin jolym ońǵarylatyn shyǵar dep oıladym. Biraq, aıaq astynan qyrsyq shaldy. Abaısyzda aıaǵymdy syndyryp alyp, bir jylǵa jýyq ýaqyt emdeldim. Jattyǵý men jarystar jaıyna qaldy. Biraq men kúderimdi úzbedim. Jazylǵannan soń barymdy salyp daıarlandym. Ereń eńbektiń esh ketpeıtinine sendim. Osy oraıda ózimniń jeke bapkerlerim – Almas Jyńǵylbaev pen Qaırat Kármenovke, Qazaqtyń Sport jáne týrızm akademııasynda prezıdenti Qaırat Zakırıanov jáne osy bilim ordasynda eńbek etip júrgen jattyqtyrýshylar – Edýard Gabdýlov, Beken Bekmuhamedov, Jetkergen Malshıev, Baqyt Sársekbaev, Dastan Sádýaqasovqa óz rızashylyǵymdy bildiremin. Sondaı-aq, jeke kásipkerler Tólegen Maqashev pen Serik Aıdarbekovke de alǵysym sheksiz. Osy aǵalarymnyń qoldaýynyń arqasynda eshteńege alańdamaı, kózdegen maqsatyma qol jetkizýge múmkindik týyndady, – deıdi Ertýǵan Zeınýlınov.
2019 jyly jaraqatynan tolyqtaı aıyqqan Ertýǵan halyqaralyq týrnırlerde qaıta atoı saldy. Almatydaǵy Saǵadat Nurmaǵambetov, Atyraýdaǵy Isataı men Mahambet jáne Aqtaýdaǵy Shoqyr Bóltekulyn eske túsirýge arnalǵan jarystarda júldegerler sanatyna qosyldy. Jyl saıyn Alataý baýraıynda úzdiksiz uıymdastyrylyp turatyn Qaırat Rysqulbekovtyń týrnırinde altyn tuǵyrǵa kóterildi. Shymkenttegi Qarakóz Ábdálıevtiń dástúrli dodasynda da qarsylas shaq keltirmedi. Sol básekelerde nebir myqtylarmen kúsh synasqan Zeınýlınovtyń sheberligi ábden shyndalyp, ózine degen senimi arta tústi.
Jýyrda Shymkentte ótken el chempıonatynda Ertýǵan Zeınýlınov 63 kılo salmaqta óner kórsetti. Bastapqy básekelerde tarazdyq Álimjan Beskempir men nursultandyq Temirhan Tezekti tize búktirse, shırek fınalda mańǵystaýlyq Dilshat Nurymdy eńserdi. Bir ókinshtisi, osy jekpe-jekte Almaty oblysy ókiliniń saýsaǵy synyp ketti. Endi alda eki jol bar. Jarysty ary qaraı jalǵastyryp, chempıondyq tuǵyrǵa kóterilý úshin aıqasqa shyǵý nemese qola medaldi qanaǵat utyp, qaıta em-dom qabyldaý. Jaǵdaıdy bapkerine aıtap kórgen edi, Qaırat Kármenov «Qolyń túsip qalsa da, judyryqtasasyń» dep áńgimeni short kesti. Boksshy basyn ızep, keliskendeı syńaı tanytty. Kelesi kúni Zeınýlınovty jartylaı fınaldyq saıys kútip turdy.
– Bizdiń odan basqa amalymyz joq edi, –dep bapkeri Qaırat Kármenov áńgimeni ary qaraı jalǵastyrdy. – Sebebi, Ertýǵan 2018 jyly aıaǵyn syndyryp alǵannan keıin ulttyq quramadan shyǵyp qaldy. Jattyǵý prosessin ary qaraı jalǵastyryp, jarystarǵa shyǵý úshin ózimiz qarjy izdep álek boldyq. Tipten, kúlli álemdi dúrliktirgen pandemııa kezinde de bos jatpadyq. Indet bastalmaı turyp, Almaty oblysy Aqsý aýdanynyń Taras aýylyna attandyq. Sol jerde Tólegen Maqashev esimdi dıqanshy-kásipker bizdiń alańsyz jattyǵýymyz úshin qolaıly jaǵdaı jasady. Tipten, el chempıonatyna baryp-qaıtý úshin qajetti qarajatty da sol kisi óz qaltasynan berdi. Sóıtip, eki aıǵa jýyq ýaqyt boıy jaqsylap turyp jattyǵyp, Shymkentke naǵyz babymyzda attandyq.
Jartylaı fınalda Zeınýlınovtyń joly Dilmurat Mıjıtovpen qıysty. Almaty qalasynyń ókili sońǵy jyldary el birinshiliginde únemi júldegerler qatarynan kórinýde. Eki maýsym boıy ol Dúnıejúzilik boks serııasy dodasynda «Astana arlandary» sapynda óner kórsetti. Mine, osy saqa sportshyǵa qarsy synyq qolymen judyryqtasqan qandasymyz taktıkalyq turǵydan óte saýatty qımyldap, kúmánsiz jeńiske jetti.
Fınalda Ertýǵan Zákir Safıýllınmen kúsh synasqysy keldi. Sebebi, osydan úsh jyl buryn dál osy boksshydan ol el chempıonatynyń jartylaı fınalynda utylǵan bolatyn. Sodan beri talaı dúrmekti kórgen jas jigittiń sheberligi ábden shyńdaldy. Endi óziniń myqtylyǵyn moıyndatý úshin Olımpıada lısenzııasyna ıelik etken sańlaqty jeńý qajet edi. Biraq bastapqy básekeleriniń birinde jaraqat alǵan Zákir jarysty jalǵastyrýdan bas tartty. Endi aqtyq synda ony Bolat Ersultan kútip turdy. Alaıda kórermender daryndy jastardyń aıqasyn kóre almady. Jartylaı fınalda jaraqattanǵan Aqmola oblysynyń ókili sharshy alańǵa shyqpady. Osylaısha, Zeınýlınov ózi kópten beri armandap júrgen Qazaqstan chempıony degen ataqqa qol jetkizdi.
Kelesi jyly Tokıo Olımpıadasynyń alaýy tutanady. Oǵan Ertýǵannyń bara almaıtyny anyq. О́ıtkeni, ǵalamdyq dodanyń lısenzııasy 34 jastaǵy ardager boksshy Zákir Safıýllıniń ýysynda. Desek te, alda álem men qurlyq chempıonattary jáne Azııa oıyndary sekildi kóptegen baıraqty básekeler bar. Mine, Almas Jyńǵylbaev pen Qaırat Kármenovtiń shákirti osy jarystarda jasyndaı jarqyraıdy dep úmittenemiz.