Aǵymdaǵy jyldyń 3 jeltoqsanynda Alık Shpekbaev eki kúndik jumys saparymen Batys Qazaqstan oblysyna keldi, dep habarlaıdy Egemen.kz Sybaılas jemqorlyqqa qarsy is-qımyl agenttiginiń baspasóz qyzmetine silteme jasap.
Jumys sapary Bórli aýdanynan bastalyp, Agenttik tóraǵasy servıstik ákimdikke taban tiredi. Ákimdikke jyl basynan beri 1200 áleýmettik qyzmet alǵan myńǵa jýyq azamat ótinish bildirdi, onyń 800-i onlaın túrde berildi.
Kórshiles Shyńǵyrlaý aýdanynda Agenttiktiń jumys toby men kórnekti qoǵam qaıratkerleri jańa servıstik ákimdik ashty. Onda turǵyndardyń jaıly jaǵdaıyn arttyrýǵa septigin tıgizetin 54 túrli memlekettik qyzmet kórsetiletin bolady. Aýdan mektepteriniń birinde "e-Ashana" sıfrly jobasyn júzege asyrý týraly bastama kótergen "Adal urpaq" klýbynyń qyzmeti tanystyryldy.
Sonymen qatar A.Shpekbaev bir mezgilde 300 adamdy qabyldaı alatyn jáne sporttyń 19 túri boıynsha jattyǵatyn Qarashyǵanaq sport keshenine bardy. Agenttik basshysynyń aıtýynsha, sport kesheninde oqýshylar úshin barlyq jaǵdaı jasalǵan, sonyń arqasynda sportshylarǵa jaqsy jaǵdaı izdep, basqa qalalarǵa ketýdiń qajeti joq.
Agenttik tóraǵasy "Qarashyǵanaq Petroleým Opereıtıng B.V." kompanııasyn aralaý barysynda óndirýshi salalardaǵy jemqorlyqtyń aldyn alýdyń strategııalyq mańyzdylyǵyn atap ótip, korporatıvtik komplaens-qyzmeti jumysynyń nátıjelerimen tanysty.
"Memleket basshysynyń saıası erik-jigeriniń arqasynda biz kvazımemlekettik sektorda ǵana emes, jeke korporatıvtik sektorda da sybaılas jemqorlyqqa qarsy tıimdi komplaensti engizý úshin senimdi quqyqtyq negiz qaladyq. Integrity ıdeologııasyn nasıhattaý dál osyndaı iri salalyq kompanııalardan bastalýy tıis. Kásipkerler tazalyq pen parasattylyq standarttaryn saqtaýǵa neǵurlym kóp kóńil bólse, soǵurlym tezirek básekege qabilettilikke qol jetkizemiz", dedi A.Shpekbaev.
Esterińizge sala ketsek, a.j. 17 qazanynan bastap kvazımemlekettik sektor uıymdarynda parasattylyqtyń korporatıvtik standarttaryn saqtaýǵa jaýapty jemqorlyqqa qarsy komplaens-qyzmetter ınstıtýty zańnamalyq deńgeıde engizildi.
Sondaı-aq, Sybaılas jemqorlyqqa qarsy qyzmet basshysy basshylardyń óz ujymdarynda jemqorlyqty joıý jáne onyń aldyn alýmen aınalysý mindeti qur sózben emes, is júzinde bolýy kerektigin basa aıtty.
Osydan keıin Agenttik tóraǵasy Memlekettik kirister basqarmasyna baryp, Shyńǵyrlaý aýdanynyń jurtshylyǵymen, bıznes-qoǵamdastyǵymen jáne aktıvimen kezdesti.
Ol jergilikti bıýdjetterdiń ońtaıly jumsalýyna baqylaýdy kúsheıtý qajettigin ataı otyryp: "Agenttik "Ashyq bıýdjetterdiń ınteraktıvti kartasy" negizinde "Ashyq bıýdjet" biregeı jobasyn iske asyrýda. Ol qoǵamdyq baqylaýǵa jáne azamattardyń qarjylyq saýattylyǵyn arttyrýǵa jańa serpin beredi. Ony iske asyrýmen Agenttiktiń aýmaqtyq departamentteriniń qyzmetkerlerinen, "Adaldyq alańy" jobalyq keńseleriniń múshelerinen jáne azamattyq qoǵam ınstıtýttarynyń ókilderinen turatyn arnaıy jumys toby aınalysady. Sondyqtan jurtshylyqty jemqorlyqqa qarsy tehnologııalardyń zamanaýı quraldaryn belsendi qoldanýǵa shaqyramyn", dedi agenttik basshysy.
Kún sońynda A. Shpekbaev "Adaldyq alańy" respýblıkalyq jobalyq keńsesiniń basshysy T.Baıǵulovpen jáne "Adal kómek" jobasynyń jetekshisi A.Omarovamen "Halyq úni" jobasy aıasynda azamattardy qabyldady.