3 jeltoqsan kúni Denısov aýdanyndaǵy Frýnze aýylynda aýdan jurtshylyǵyn dúrliktirgen jan shoshyrlyq oqıǵa boldy. Oblystyq tótenshe jaǵdaı departamentiniń málimetinshe, qaza tapqan sábılerdiń biri – 2016 jyly týǵan qyz, ekinshisi eki jasar ul bala, dep habarlaıdy Egemen.kz
О́rt shyqqan úıdiń ıeleri tústen keıin saǵat 14:00-de eki balany syrtynan qulyptap, kórshiles Áıet aýylyna azyq-túlik alýǵa ketken. Eki saǵattan soń qaıta oralǵan erli-zaıypty úıge kirisimen, birden ystyń ótkir ıisin sezedi.
"Júgirip ishki bólmege engen olar aldymen ul balany, odan keıin qyz balany syrtqa alyp shyǵyp, dereý feldsherlik pýnktten dáriger, jergilikti seriktestikten erikti órt sóndirý jasaǵyn shaqyrtqan. О́kinishke qaraı, saǵat 17:00-de eki balanyń ólimi tirkeldi. Ekeýi de es jııa almaǵan kúıi kóz jumdy", dedi oblystyq TJD-nyń bastyǵy Azamat Orynbaev.
О́rttiń shyǵý sebebi qaraýsyz qalǵan sábılerdiń ot shyǵaryp oınaǵanynan bolǵan. Balalar jatyn bólmede shyrpy jaǵyp oınap, órt bastalǵanda qorqyp kelesi bólmege baryp tyǵylǵan. Nátıjesinde, ekeýi de ystan ýlanyp kóz jumyp otyr.
TJD mamandarynyń aıtýynsha, oblysta jyl basynan beri órt saldarynan 4 sábı kóz jumǵan. О́rt sóndirýshiler oblys turǵyndaryna, ásirese, qysqy maýsymda qaýipsizdik sharalaryn muqııat saqtaýdy jáne úıdegi balalardy qaraýsyz qaldyrmaýdy eskertedi.