Oblysta áleýmettik mańyzy bar 1444 tonna azyq-túlik qory jınaqtalǵan. Ákimdik áleýmettik mańyzy bar 19 azyq-túlik taýarynyń baǵasyn turaqtandyrýǵa baǵyttalǵan is-sharalar keshenin josparlap, júzege asyrýda, dep habarlaıdy Egemen.kz.
Naryqty retteý jumysy «Kókshe» áleýmettik-kásipkerlik korporasııasy arqyly júzege asyrylýda. Mekeme óńirlik taýar óndirýshilerdi qoldaý arqyly tutynýshyǵa sapaly ári arzan azyq-túlik usynýdyń utymdy mehanızmin jolǵa qoıyp otyr.
Áleýmettik kásipkerlik korporasııasy azyq-túliktiń suranysqa ıe 19 túrin tikeleı taýar óndirýshiden satyp alyp, naryqtaǵy baǵanyń negizsiz ósýine jol bermeıdi. Kartop, sábiz, qyryqqabat, kúrish tárizdi taýarlardyń maýsymdyq baǵa ózgerisin shekteý maqsatynda arnaıy qor qurylǵan. Mekeme azyq-túliktiń shekti baǵasyn saqtaýǵa, múmkin bolsa odan arzan saýdalaýǵa kúsh salady.
Mysaly, tazartylǵan kúrishtiń shekti baǵasy 404 teńge dep belgilengenmen, Aqmola naryǵynda kúrish 230 teńgeden saýdalanady. Al, bıdaı uny belgilengen 155 teńgeniń ornyna 110 teńgeden usynyldy. Tundyrylǵan ósimdik maıynyń shekti baǵasy 433 teńge bolsa, áleýmettik pavılondarda 390 teńgeden alasyz. 2020 jyldyń 4-shi toqsanynda qant 194, kartop 90 teńgeden satylýda.
"Azyq-túliktiń baǵasyn turaqtandyrý óte mańyzdy. Jaman tumaý jaılaǵan kezde halyq qysylyp qalmaýy kerek. Qazir bizde 1 444 tonna azyq-túlik saqtaýly. Jyl basynan beri 800 tonna ónim saýdalandy", – deıdi «Kókshe» áleýmettik kásipkerlik korporasııasy jetekshisiniń orynbasary Gúlmıra Jazına.
Azyq-túlik naryǵyn retteýdiń ekinshi tásili taýar óndirýshilerge paıyzsyz nesıe berý. Mundaǵy shart bireý ǵana. Kásiporyn shekti baǵa mólsherin saqtaýǵa kepildik beredi. Osylaısha, óńirlik taýar óndirýshi men tutynýshynyń múddesin bir arnaǵa toǵystyrýǵa bolady. Bıznes nysandarynyń ótinishin kásipkerlik jáne ónerkásip basqarmasy janyna qurylǵan komıssııa taldaıdy.
Aqmolalyq kásiporyndarǵa 835 mln. teńge bólingen. Osylaısha, sút, aıran, súzbe, sary maı, qus eti men kartop baǵasy turaqtandyryldy. Bul mehanızm taýar baǵasynyń kúrt ósýine qarsy jyldam áreket etý múmkindigin usynady deıdi mamandar. Mysaly jýyq arada, jumyrtqa baǵasyn retteý kózdelip otyr. Turaqtandyrý qorynyń azyq-túlikteri áleýmettik pavılondarda saýdalanady.