Shymkent qalasynyń ANTICOR ortalyǵynda "Qoǵamda sybaılas jemqorlyqqa qarsy mádenıetti qalyptastyrý: qoǵammen baılanys" atty forým boldy, dep habarlaıdy Egemen.kz
Halyqaralyq sybaılas jemqorlyqqa qarsy kúres kúnine oraı uıymdastyrylǵan is-sharada atalǵan dertpen kúresý máseleleri jan-jaqty talqyǵa tústi.
Shymkent qalasynyń ákimi Murat Áıtenov forýmnyń mańyzdylyǵyna toqtalyp, bul baǵyttaǵy atqarylǵan jumystardan habardar etti.
– Memleket basshysy Qasym-Jomart Toqaev "Halyq únine qulaq asatyn memleket" tujyrymdamasyn iske asyrý úshin "Memlekettik basqarýdyń jańa úlgisin qalyptastyrý", "Ádiletti memleket qurý" jáne "Azamattardyń memleketti basqarý isine qatystyrý" baǵytynda memlekettiń jańa standarttaryn ázirleý boıynsha birqatar tapsyrmalar berdi. Bul dertpen kúreske qoǵam bolyp jumylýymyz kerek. Qalada sybaılas jemqorlyqqa qarsy mádenıetti qalyptastyrý maqsatynda "Shymkent – adaldyq alańy" jobalyq keńsesi, "Ashyq ákimdik", "Front ofıs" jobalary jumys isteýde. Shymkent qalasy ákimdigi tarapynan kórsetiletin memlekettik qyzmetter túrlerin elektrondy formatqa aýystyrýda kóptegen jumystar atqaryldy. Atqarylǵan jumystardyń sapasyn joǵary nátıjege jetkizý úshin qala turǵyndary arasynda sybaılas jemqorlyqqa múldem tózbeýshilik qaǵıdasyn iske asyrýymyz kerek, – dedi qala ákimi.
Sondaı-aq forýmda Sybaılas jemqorlyqqa qarsy is-qımyl agenttiginiń Shymkent qalasy boıynsha departamentiniń basshysy Ashat Jumaǵalı, aqparattyq-aǵartýshylyq shtabynyń músheleri – jazýshy Marhabat Baıǵut, qoǵam qaıratkeri Shalataı Myrzahmetov, saıasattanýshy Sáken Májinbekov, taǵy basqalar baıandama jasap, óz oılaryn ortaǵa saldy.
Is-shara sońynda belsendi qoǵam ókilderi, BAQ ókilderi, "Parasatty otbasy", jas sýretshiler, beınerolık baıqaýynyń jeńimpazdary marapattaldy.