Jýyrda M.O.Áýezov atyndaǵy ádebıet jáne óner ınstıtýtynyń uıymdastyrýymen Áýezov murajaıynda belgili jýrnalıst-jazýshy Dáýlet Seısenulynyń kórnekti abaıtanýshy, Memlekettik syılyqtyń laýreaty Qaıym Muhamedhanov týraly «Er qazaq» dep atalatyn derekti kitabynyń tusaýkeseri ótkizildi.
Bul sharanyń atalǵan murajaıda ótkizilýiniń ózindik sebebi de joq emes. Iаǵnı Qaıym ǵulama Muhtardyń súıikti shákirti hám senimdi serigi bola bilgen adam. Muhańnyń aqyl-keńesimen keshegi aýmaly-tókpeli zamanda esh taısalmastan Abaı taqyrybyna dendep boılaı bilgen, hakim óleńderiniń tekstologııasymen ómiriniń sońyna deıin qajymaı, talmaı aınalysqan, otyzdan astam óleńin qatarǵa qosqan, Abaıdyń aqyndyq mektebin túbegeıli zerttegen, Abaı murajaıynyń irgetasyn qalasyp, alǵashqy basshysy bolǵan, basyna qater tóngendigine qaramastan ustazyn satpaǵan ol respýblıka ánuranynyń avtory ekendigine qaramastan túrmeniń azaby men mazaǵyn bir kisideı-aq kórgen-di.
Muny bir desek, onyń syrtynda Muhań Qaıymdy ádebıet ınstıtýtyna qyzmetke bir emes eki ret shaqyrtqan eken. Al onyń reti bolmaǵan soń aıdaýdan oralǵan shákirtiniń osynda ekinshi qaıtara ǵylymı eńbegin sátimen qorǵap shyǵýyna qamqorlyq tanytqan da Áýezov. Osy oraıda astyn syzyp, bir atap aıtarlyq bir jaıt sol, Qaıym aǵa Abaıdyń 150 jyldyǵy qarsańynda ustazynyń atyndaǵy ádebıet ınstıtýtynda qyzmet atqaryp, aqynnyń merekelik basylymynyń durys shyǵýyna, sonymen birge «Abaı» ensıklopedııasynyń jaryq kórýine aıanbaı atsalysyp, laıyqty túrde Memlekettik syılyqtyń laýreaty atanǵan edi.
Mine, osyndaı qıly taǵdyrdy basynan ótkergen abaıtanýshy ǵalymnyń ómiri men shyǵarmashylyǵyna arnalǵan kitaptyń tusaýkeserin Ádebıet ınstıtýtynyń Abaıtaný jáne jańa dáýir ádebıeti bóliminiń meńgerýshisi, professor Serikqazy Qorabaı júrgizip otyrdy. Tusaýkeser rásiminde sóz alǵan belgili abaıtanýshy ǵalym Tursyn Jurtbaı, Pedagogıka ǵylymdary akademııasynyń prezıdenti, akademık, Memlekettik syılyqtyń laýreaty Asqarbek Qusaıynov, Shyǵystaný ınstıtýtynyń dırektory, belgili ǵalym, aqyn Dúken Másimhanuly, Áýezov murajaıynyń dırektory, Muhańnyń jıen nemeresi Dıar Qonaev, fılologııa ǵylymdarynyń doktory Aıgúl Ismaqova, aqyn, halyqaralyq «Alash» syılyǵynyń laýreaty Áýbákir Qaıran, Qaıym Muhamedhanov atyndaǵy Bilim jáne mádenıet qoǵamdyq qorynyń dırektory, ǵylym doktory Dına Muhamedhanova kórnekti abaıtanýshyǵa arnalǵan alǵashqy kitaptyń ózindik erekshelikterine keńinen toqtaldy. Ana zamanda Qaıym jazǵan ánurannyń sózi burmalanyp, «biz qazaq» bolyp ógertilgeni, sol sóz endi ózine ornymen qaıtyp oralǵany da aıtylmaı qalmady. Uly Jánibektiń demeýshiligimen shyqqan kitapty endigi jerde memlekettik tapsyryspen shyǵarý kerektigi jóninde ońdy usynys ta aıtylyp jatty. Aqyn Áýbákir ustazyna arnalǵan óleńin oqydy.
Al kitap avtory Dáýlet Seısenuly bolsa óz kezeginde osy sharaǵa uıytqy bolǵan ınstıtýt pen murajaı basshylyǵyna, kitaptyń resenzenti Tursyn Jurtbaı men kitap avtorynyń ǵylymı keńesshisi Dına Muhamedhanǵa, sonymen birge jıynda óz pikirlerin aıtyp, ıgi tilekterin ortaǵa salǵan sheshenderge rızashylyǵyn bildirdi.
Abaı jylynyń aıasynda ótken jıyn sońynda kitap avtory Otanymyzdyń ulaǵatty uly Qaıym Muhamedhanovty este saqtap, onyń shyǵarmashylyq murasyn nasıhattaýǵa qosqan úlesi úshin onyń mereıtoılyq medalimen marapattaldy. Ony Áýezov murajaıynyń dırektory Dıar Qonaev tabystady.
ALMATY