Ulttyq bank Qarjy naryǵyn retteý jáne damytý agenttigimen birlesip, kásipkerlerge jeńildikpen nesıe berý sheńberinde bankterdi qarjylandyrý lımıtterin belgiledi, dep jazady Egemen.kz.
Qosymsha bólingen 200 mıllıard teńgeni eskere otyryp, jańa lımıtter belgilendi. Atap aıtqanda, qarjylyq retteýshi bankter úshin osyndaı lımıtter belgiledi: «Qazaqstan Halyq Banki» AQ - 229,3 mlrd teńge, «Jysan Bank» AQ - 13,5 mlrd teńge, «Jınaq banki» AQ EB - 131,3 mlrd teńge, Bank SentrKredıt AQ - 93 mlrd teńge,«Bank RBK» AQ - 67,4 mlrd teńge, «Nurbank» AQ - 15 mlrd teńge, «Eýrazııalyq bank»AQ - 35,8 mlrd teńge, «Alfa-Bank EB» AQ - 39,8 mlrd teńge, «Altyn Bank» AQ - 11,7 mlrd teńge, «ATF Bank» AQ - 60,1 mlrd teńge, «ForteBank» AQ - 61 mlrd teńge, Bank VTB AQ enshiles uıymy (Qazaqstan) - 12,1 mlrd.
Barlyǵy 770 mıllıard teńge bólindi.
Ulttyq bank agroónerkásiptik keshende jumys isteıtin iri kásiporyndar men kásipkerlerdi qamtý aıasy keńeıtilgenin atap ótti. Baǵdarlamanyń merzimi 2021 jyldyń 31 jeltoqsanyn qosa alǵanda uzartyldy, qarajatty berý merzimi 2021 jyldyń 31 naýryzyna deıingi merzimdi qamtıdy.
Iri kásiporyndarǵa nesıe berý úshin tótenshe jaǵdaı rejımin engizý áser etken óndiristik jáne qyzmet kórsetý salalaryndaǵy qyzmetterdiń tizbesi anyqtaldy, ol Ulttyq Bank Tóraǵasy men Ulttyq ekonomıka mınıstriniń 2020 jylǵy 18 qarashadaǵy birlesken buıryǵymen bekitilgen. Esterińizge sala keteıik, Qazaqstan Prezıdenti Qasym-Jomart Toqaev 1 qyrkúıekte halyqqa úndeý joldady. Memleket basshysy Ulttyq bank eń kóp zardap shekken sektorlardaǵy ShOB úshin aınalym qarajatyn toltyrý baǵdarlamasyn júzege asyryp jatqanyn atap ótti. Baǵdarlama bıyl aıaqtalýy kerek bolatyn. Alaıda Prezıdent onyń qoldanylý merzimin 2021 jyldyń sońyna deıin uzartýǵa, sondaı-aq onyń qamtý aıasyn keńeıtýge buıryq berdi. Bul maqsattarǵa qosymsha 200 mıllıard teńge qarastyrylǵan.