Eýropa komıssııanyń tóraǵasy Qazaqstandy aldaǵy Táýelsizdik merekesimen quttyqtady, dep habarlaıdy Egemen.kz
Eýropa komıssııanyń tóraǵasy (Eýropa keńesiniń Venesııalyq komıssııasy) Djannı Býkıkkıo Qazaqstan men Eýropa keńesi arasyndaǵy yntymaqtastyqty damytýǵa qosqan úlesi úshin I dárejeli «Dostyq» ordenimen marapattaldy.
Marapattaý rásimi Eýropa keńesiniń shtab-páterinde Adam quqyqtary kúni jáne Qazaqstan Respýblıkasynyń Táýelsizdik kúni qarsańynda ótti.
Komıssııa basshysy Prezıdent Qasym-Jomart Toqaevqa Táýelsizdik kúnimen jyly quttyqtaýlaryn jáne qazaq halqyna izgi tilekterin jetkizýdi surady. Táýelsiz Qazaqstannyń qalyptasýyna kýá bola otyryp, ulttyq zańnamany reformalaýǵa qatysqan Dj. Býkıkkıo memleket basshylyǵy júrgizip otyrǵan ishki saıası baǵytqa, sondaı-aq elimizdiń konstıtýsııalyq jáne sot organdarynyń qyzmetine joǵary baǵa berdi.
Sonymen qatar, Venesııalyq komıssııanyń joǵary laýazymdy ókilderi Tomas Markert, Sergeı Kýznesov jáne Shnýs Dıýrr «Qazaqstan Respýblıkasynyń Konstıtýsııasyna 25 jyl» merekelik medaldarymen marapattaldy.
Dj. Býkıkkıo komıssııa tarapynan Qazaqstan ony árdaıym eldiń demokratııalyq qalyptasýyna yqpal etetin senimdi dosy men seriktesi retinde kóre alatynyn atap ótti.
Venesııalyq komıssııa ókilderi Qazaqstandaǵy aǵymdaǵy ishki saıası jáne áleýmettik reformalarmen, eldiń 2021 j. 10 qańtarynda ótýi tıis paralamenttik saılaýǵa daıyndyq barysymen, sondaı-aq Syrtqy ister mınıstri Muhtar Tileýberdiniń «Adam quqyqtary-jahandyq jáne ulttyq basymdyq» atty maqalasymen tanysty.
Quqyq arqyly demokratııa úshin eýropalyq komıssııa (Venesııalyq komıssııasy) Eýropa keńesi janyndaǵy konstıtýsııalyq quqyq boıynsha konsýltatıvtik organ jáne adam quqyqtaryn qorǵaý salasyndaǵy negizgi saraptamalyq ınstıtýt bolyp tabylady. 2012 jyldan bastap Qazaqstan onyń tolyqqandy múshe bola otyryp, aldyńǵy qatarly sheteldik quqyqtyq tehnologııalarǵa qol jetkizýde. Komıssııasynyń usynystary ulttyq zańnamany ázirleý kezinde qoldanylady.