Qostanaılyq polıseıler qyzmettik boryshyn oryndaý barysynda qaza tapqan áriptesteriniń otbasyna baryp, Táýelsizdik kúni merekesimen quttyqtap shyqty，dep habarlaıdy Egemen.kz
Polıseıler aldymen 1992 jyly qyzmet ústinde qaza tapqan mılısııa starshınasy Fedor Balanovskııdiń otbasyna kirip shyqty. Fedor ishki ister organdarynda 14 jyl qyzmet etken tájirıbesi mol maman edi. 1992 jylǵy 7 tamyzda mılısııa starshınasy ustalǵan kúdiktini polısııa bólimine ákele jatqanda, qapyda tártip saqshysynyń tabeldik qarýyn qolyna túsirgen qylmyskerdiń oǵynan qaza tapty.
Odan keıin departament qyzmetkerleri marqum Qaıyrjan Jappasbaevtyń úıine bardy. Jol polısııasynyń ınspektory 2009 jylǵy 1 tamyzda kólik qozǵalysyn rettep turǵan jerinde mas júrgizýshiniń kinásinen bolǵan jol apatynan kóz jumdy. Marqumnyń artynda jubaıy men jalǵyz uly qaldy.
Oblystyq polısııa departamenti kadr saıasaty basqarmasy bastyǵynyń orynbasary Qýanysh Dúısebaev oblys polıseıleri atynan eki otbasyna da aqshalaı syılyq tabys etip, alda kele jatqan elimizdiń bas merekesimen quttyqtady.