Túrkistan oblysynda nashaqorlyqpen kúres júıeli túrde júrgizilip kele jatqanymen esirtkige elitip, táýeldi bolyp qalýshylar az emes. Sonymen qatar búginde esirtkiniń sıntetıkalyq túrleri kóbeıgen. Bul oraıda óz mindetin minsiz atqaryp júrgen polısııa qyzmetkerleri qyraǵylyq tanytyp, esirtki saýdasynyń aldyn alýda. Esirtki qylmysyna qarsy is-qımyl basqarmasynyń qyzmetkerleri arqyly bıyldyń 10 aıynda esirtkiniń zańsyz aınalymyna qatysty 383 derek tirkelgen.
Naqtyraq aıtsaq, esirtki satýdyń – 61, asa iri kólemde esirtki saqtaý – 20, esirtki kontrabandasy – 29, al esirtki ósimdigin zańsyz egip-ósirýdiń 75 deregi anyqtalǵan. Sondaı-aq zańsyz aınalymnan 6 tonna 719 kılo esirtki zaty tárkilendi. Oblystyq Polısııa departamenti baspasóz qyzmetiniń dereginshe, sotqa 154 is joldanyp, 147 tulǵa qylmystyq jaýapkershilikke tartylǵan. Máselen, Esirtki qylmysyna qarsy is-qımyl basqarmasynyń qyzmetkerlerimen júrgizilgen jedel-izdestirý jumystary barysynda qarasha aıynda Maqtaaral aýdany turǵynynyń 6 gramm marıhýanany satqany anyqtalyp, quryqtaldy. Onyń úıine tintý júrgizý kezinde 8 dana sirińke qoraby jáne qaǵazǵa oralǵan jalpy salmaǵy 21 gramm marıhýana tárkilendi. Kúdikti qamaýda. Odan bólek 6 gramm marıhýana satqan Keles aýdanynyń turǵyny anyqtalyp, ustaldy. Tintý júrgizý kezinde onyń úıinen 1 dana qaǵazǵa oralǵan salmaǵy 23 gramnan asatyn marıhýana esirtki zaty tárkilendi. Sonymen qatar Tólebı aýdanynyń turǵyny da esirtki satyp ustalǵan. Atalǵan qylmystyq isterge qatysty Qylmystyq kodekstiń 297-babymen «Esirtki, psıhotroptyq zattardy, sol tektesterdi ótkizý maqsatynda zańsyz daıyndaý, qaıta óńdeý, ıemdený, saqtaý, tasymaldaý, jóneltý ne ótkizý» boıynsha tergeý amaldary júrgizilýde.
Saryaǵash APB-niń patrýldik polısııa ınspektorlary reıdtik jumystaryn júrgizý barysynda kúmán týdyrǵan avtokólikti toqtatqan. Tekserý kezinde avtokóliktiń ishinen ańshy myltyǵy men kólikte otyrǵan jolaýshy er azamattyń qaltasynan paketke oralǵan hosh ıisi bar esirtkige uqsas ósimdik tabylyp, zattaı dáleldeme retinde tárkilengen. Atalǵan jaıt Qylmystyq kodekstiń 296-baby «Esirtki, psıhotroptyq zattarmen, sol tektestermen ótkizý maqsatynsyz zańsyz jumys isteý» boıynsha tirkeldi. Saraptamaǵa sáıkes, tárkilengen esirtki salmaǵy shamamen 3 gramm bolatyn «keptirilgen marıhýana» bolyp shyqty. Osy oqıǵa boıynsha qazirgi tańda tergeý amaldary júrgizilýde. Esirtkige qatysty taǵy bir oqıǵa osy aýdanda oryn alyp otyr. Saryaǵash APB kezekshi bóliminiń «102» pýltine «Jibek joly» shekara beketinde esirtki kontrabandasynyń is-áreketi anyqtalǵany týraly habarlama kelip tústi. Bul oqıǵada polıseılerge Nano atty qyzmettik ıt kómektesken. Iаǵnı ıisshil ıt ótkizý pýnktinen ótý kezinde sheteldikterdiń birine belgi bergen. Jedel ýákilder kúdikti О́zbekstan azamatyn tintý kezinde kúrteshesinen esirtki zatyna uqsas túıinshekti taýyp, tárkiledi. Tártip saqshylary ustalǵan azamatty aýdandyq polısııa bólimine jetkizdi. Saraptamaǵa sáıkes, alynǵan ósimdik tektes zat salmaǵy 1 gramnan asatyn «keptirilgen marıhýana» bolyp shyqty. Qazirgi ýaqytta atalǵan jaıt boıynsha Qylmystyq kodekstiń 286-baby «Aınalymnan alynǵan zattardyń nemese aınalysy shektelgen zattardyń kontrabandasy» boıynsha sotqa deıingi tergeý amaldary júrgizilýde. Kúdikti qamaýǵa alynǵan.
Esirtkige qarsy kúresti báseńdetpegen tártip saqshylary oblys turǵyndaryn zııandy ádetterden bas tartyp, salaýatty ómir saltyn ustanýǵa shaqyrady. Sondaı-aq esirtki zattaryn zańsyz saqtaǵany, ótkizgeni, ósirgeni jáne kontrabandasy úshin qylmystyq jaýapkershilik qarastyrylǵanyn únemi eskertip keledi.
Túrkistan oblysy