Qyzylordada Táýelsizdik kúni qarsańynda 80 otbasy baspanaly bolyp, 500 oryndyq mektep paıdalanýǵa berildi, dep habarlaıdy Egemen.kz.
Oblys ákimi Gúlshara Ábdiqalyqova men qala ákimi Nurlybek Nálibaev Syrdarııa ózeniniń sol jaǵalaýynan boı kótergen 2 kópqabatty turǵyn úıdi paıdalanýǵa berýge arnalǵan is-sharaǵa qatysyp, onda 80 otbasyǵa jańa baspana kilti tabystaldy. Baspanaǵa ıe bolǵandar qatarynda muǵalimder, dárigerler jáne mádenıet salasynyń mamandary bar.
Páter ıelerin jańa qonystarymen quttyqtap, qurylys salasyndaǵy aımaqtyń jetistikterin atap ótken óńir basshysy bıyl Qyzylorda qalasynda 580 páterdi quraıtyn 15 turǵyn úı paıdalanýǵa berilgenine toqtalyp, jyl aıaǵyna deıin Syrdarııa ózeniniń sol jaǵalaýynda 725 páterlik 15 kópqabatty turǵyn úıdiń 14-i tabystalyp, 2021 jyly SPMK-70 turǵyn aýdany boıynsha 13 kópqabatty turǵyn úıdiń qurylysy aıaqtalatynyn aıtty.
Sońǵy jyldary Syr eliniń bas shaharynda jekemenshik mektepterdiń qatary kóbeıip keledi. Sonyń bir dáleli mereke aıasynda paıdalanýǵa berilgen 500 oryndyq «Zerde» ıntellektýaldy mektebi.
Jańa mekteptiń ashylýynda oblys ákimi bilim uıasynan táýelsiz elimizdiń damýyna aıanbaı úles qosyp, Syr elin álemge tanytar zııatker urpaq bilim alyp shyǵady dep senim bildiretindigin jetkizdi.
Intellektýaldy mektep ǵımaraty 3 qabattan turady. Birinshi qabatta oqýshylar úshin sportzal, bı zaly, ashana men oqý kabınetteri ornalassa, ekinshi qabatta balalar demalys alańy jáne tennıs zaly salynǵan. Al, úshinshi qabat zamanaýı úlgidegi akt zal, kompıýter synypqa arnalǵan. Jańa bilim uıasy 120 adamdy jumyspen qamtyǵan. 8 myń sharshy metr jerge ornalasqan ǵımarattyń aýlasynyń jalpy kólemi 1,6 gektardy quraıdy.
Zamanaýı baǵytta salynǵan ıntellektýaldyq mekteptiń erekshelikterimen tanystyrǵan bilim uıasynyń quryltaıshysy Seıtqalı Alshynbaev «Zerde - oqýshylardyń jaryq ta keń, jańa tehnologııalarmen jabdyqtalǵan mektepte bilim alýyna múmkindik syılaıdy» - dep, atap ótti.
Aıta keteıik, Qyzylorda óńirinde 293 memlekettik mektep bolsa, jeke mektepter sany 8-ge jetti.