Túrkistan oblysynyń ákimi О́mirzaq Shókeev saýyqtyrý ortalyǵynyń tusaýyn kesip, Elbasynyń elimizdiń daryndy jastaryn anyqtaý jáne qoldaý boıynsha «El úmiti» bastamasynyń jeńimpazdaryn marapattady, dep habarlaıdy Egemen.kz.
Nursultan Nazarbaev qorynyń «Qamqorlyq» ońaltý ortalyǵy Túrkistan oblystyq balalar aýrýhanasynyń tusynan ashyldy. AQSh, Italııa, Germanııa, Avstrııa jáne Reseı memleketterinen ákelingen 100-ge jýyq jańa qural-jabdyqtarmen qamtylǵan ortalyq Túrkistan oblysy men Shymkent qalasynyń balalaryn qabyldaıdy. Saýyqtyrý ortalyǵynda «Tirkeýge arnalǵan aýdıometrııalyq modýl» ornatylǵan. О́ńirdegi alǵashqy qurylǵy jańa týylǵan nárestelerden bastap, gıperkınetıkalyq sal aýrýy jáne aýtızmmen aýyratyn naýqastardy zertteýge múmkindik beredi.
Sondaı-aq, beıne-elektroensefalografııa kabıneti jumys isteıtin bolady. Bul erekshe qamqorlyqty qajet etetin balalar úshin taptyrmaıtyn múmkindik.
Jalpy 500 sharshy metrdi qamtıtyn ortalyqta mehanoterapııaǵa arnalǵan jabdyqtar, ıppoterapııaǵa arnalǵan s-rider Sky trenajeri, «Atlant» neıro-ortopedııalyq pnevmokostıými, «Mýltısteneder Djenks», júrýge jáne aıaq-qoldarǵa arnalǵan, pozısııalyq júıeler, montessorı damytýshy trenajerlar jıyntyǵy men qoldyń usaq motorıkasyn damytýǵa arnalǵan oıyn terapııasy jıyntyqtarymen jasaqtalǵan.
Ortalyqta bilikti mamandar sońǵy emdik ádisterdi paıdalana otyryp neıro-ortopedııalyq buzylýlary bar balalar men jasóspirimderge keshendi medısınalyq-áleýmettik jáne psıhologııalyq-pedagogıkalyq kómek kórsetip, saýyqtyrý sharalaryn júrgizedi. Mamandardyń barlyǵy arnaıy daıarlyqtan ótken. Ońaltý kýrsy – 21 kún. Munda jylyna 360 balany saýyqtyrý josparlanýda. Erte damý ortalyǵyndaǵy keshendi emi múmkindigi shekteýli balalardyń áleýmettik jáne aqyl, dene jaǵynan damyp jetilýin qalyptastyrýǵa septigin tıgizedi. Atap aıtqanda, qozǵalys pen sóıleýdegi kórsetkishterin qalpyna keltirýge múmkindik beredi.
Sondaı-aq ortalyqtyq ashylýy is-sharasy barysynda oblys ákimi «Elbasy medali» boıynsha bes baǵytta kósh bastaǵan oqýshylarǵa marapattaryn tabys etti. Saryaǵash aýdanynyń oqýshysy Marǵulan Ádilbek, «Myń bala» ulttyq olımpıadasynyń júldegeri, Jetisaı aýdanynyń «Daryn» mektep-ınternatynyń oqýshysy О́telbaı Dáýirhan, Shymkent qalasyndaǵy er balalarǵa arnalǵan lıseı-ınternatynyń oqýshysy Sherhan Jambekov arnaıy medalǵa ıe boldy.