Jylyoı aýdanyndaǵy Teńiz ken ornyna kelgen jumysshylar blok-beketten PTR anyqtamasyz ótýge tyrysqan, dep habarlaıdy Egemen.kz.
Jumysshylardyń bul áreketin Jylyoı aýdandyq polısııa bólimi Teńiz polısııa bólimshesiniń qyzmetkerleri baıqap qalǵan. Sodan keıin polıseıler ken ornyndaǵy blok-beketti aınalyp ótýge tyrysqan bir top adamnyń jolyn kesti.
«Atalǵan bólimsheniń patrýldik polısııa ınspektory, polısııa kapıtany Tileýke Qumarov áriptesterimen birge Qulsary qalasynda turatyn 31 jastaǵy azamattyń basqarýyndaǵy «Lada Granta» kólikti vahtalyq kentke kireberiste toqtatty. Júrgizýshiden ózge salonda tórt er adam bolǵan. Olardyń ekeýi Orynbor qalasynda turatyn Reseı azamattary bolyp shyqty», dep habarlady oblystyq polısııa departamentiniń baspasóz qyzmeti.
Qujattardy tekserý kezinde úsh jolaýshynyń, onyń ishinde bir reseılik azamattyń qolynda PTR-testten ótkendigi týraly anyqtama bolmaı shyqty. Kóliktegiler «Teńiz» vahtalyq kenti aýmaǵynda ornalasqan kompanııalardyń birine barýdy kózdegen.
Qazir jınaqtalǵan qujattar tıisti sheshim qabyldaý úshin aýdandyq sanıtarlyq-epıdemıologııalyq qadaǵalaý bólimine joldandy.