Búginde álemde koronavırýs ınfeksııasyn 72 mıllıonnan astam adam juqtyryp, bul indetten 1,6 mıllıonnan astam adam kóz jumdy. QR Densaýlyq saqtaý mınıstrliginiń málimetterine sáıkes, Qazaqstandaǵy statıstıka kelesideı: osy kúnge deıin 185 myńnan astam indetke shaldyqsa, onyń 2,5 myńnan astam oqıǵasy qazamen aıaqtaldy. Pandemııa bastalǵaly beri Almatyda 17 myńnan astam oqıǵa tirkelgen, dep habarlaıdy Egemen.kz.
Bul týraly О́ńirlik kommýnıkasııalar qyzmetiniń alańynda ótken onlaın-brıfıng barysynda Almaty qalalyq Qoǵamdyq densaýlyq saqtaý basqarmasynyń shtattan tys bas anestezıolog-reanımatology Tileýberdi Qýandyqov aıtty.
«Almatyda jańa dertpen kúresýde teńdesi joq sharalar qabyldandy. Az ýaqyttyń ishinde 15 ınfeksııalyq stasıonar, sonyń ishinde ınfeksııalyq emes klınıkalardyń bazasynda ashyldy. Atalǵan stsıonarlardyń reanımasııa bólimderinde kún saıyn aýyr jaǵdaıdaǵy 160 naýqas jatty. Qalanyń densaýlyq saqtaý salasyna qanshalyqty úlken júk artylǵanyn elestete berýge bolady. Pandemııa qatty órshigen kezde jaǵdaıylary aýyr naýqastarǵa tıimdi em jasaý úshin barlyq stasıonarlardyń jumysyn biriktiretin qurylym qurý týraly sheshim qabyldandy. Osy maqsatqa jetý úshin biz Ortalyq qurdyq, onyń maqsaty jansaqtaý bólimderindegi naýqastardy emdeý sapasyn arttyrý úshin barlyq ınfeksııalyq stasıonarlardyń jumysyn úılestirý boldy», - dedi dáriger.
Qurylǵan Anestezıologııa jáne reanımatologııa ortalyǵynyń quramyna osy saladaǵy qalanyń úzdik mamandary kirdi. Jumystyń máni koronavırýs ınfeksııasy bar aýyr naýqastarǵa qarqyndy terapııa kórsetetin dárigerlerge keńes berý, ádistemelik jáne praktıkalyq kómek kórsetý boldy. Ol úshin osy ortalyqtyń mamandary kún saıyn sol juqpaly aýrýlar stasıonarlaryna baryp, sol jerde reanımatologtarǵa kómek kórsetedi.
Praktıkalyq kómek kórsetýden basqa, brıgadalardyń dárigerleri aýyr naýqastarǵa keńes berdi. Qajet bolǵan jaǵdaıda bul jumysqa jetekshi professorlardy tartyp, túrli onlaın platformalardy paıdalana otyryp konsılıýmdar júrgizdi. Osy kezeńde mamandar brıgadasynyń shaqyrtýlar boıynsha 2 myńnan astam ret baryp, aýyr naýqastarǵa arnalǵan 5 myńnan astam konsýltasııa júrgizip, beıne baılanys jáne «ornynda» 100-ge jýyq konsılıýmdar júzege asyryldy.
«Biz reanımatologııa ortalyǵyn shildeniń birinshi jartysynda qurdyq jáne onyń jumysynyń nátıjesin pnevmonııadan ólim azaıa bastaǵan kezde, birneshe kúnnen keıin aldyq. Birinshi aptanyń ishinde ol birneshe ese azaıdy. Jaqsaryp, úıine shyǵarylyp jatqan naýqastar kóbeıdi. Biz densaýlyq saqtaý mınıstrligi únemi ótkizetin respýblıkalyq konferensııa-semınarlarda anestezıologııa jáne reanımatologııa qyzmetiniń jumysyn uıymdastyrý tájirıbesin respýblıkamyzdyń barlyq óńirlerimen bólistik», - deıdi Tileýberdi Qýandyqov. Spıker pandemııa kezindegi tıimdi sharalardyń biri retinde koronavırýstyq ınfeksııany, onyń ishinde qarqyndy emdeý hattamasyn ázirleýdi atap ótti.