Almaty qalasynyń ákimi Baqytjan Saǵyntaev Táýelsizdik kúni qarsańynda Alataý aýdanynda ashylǵan Alatau Creative HUB-ynyń jumysyn bastap berdi, dep habarlaıdy Egemen.kz.
Uzaq merzimdi «Almaty-2050» damý Strategııasyndaǵy basty baǵyttardyń biri – kreatıvti ındýstrııalardy damytý. Qala ákimi Saǵyntaev Instagram paraqshasynda Alatau Creative HUB Almatydaǵy kreatıvti ındýstrııalardy damytýdyń alǵashqy qadamy ekenin jazady.
«Qala ekonomıkasynyń qurylymyn ártaraptandyrý úshin qajetti jańa taýashalar qurylýda. Shyǵarmashylyq turǵyda ózin damytyp, eńbek nátıjelerin monetızasııalaý úshin barlyq jaǵdaı jasalǵan. Marketıng-quraldar, PR, ıventıka kesheni usynylyp otyr. Munda baspa úıi, kitap dúkenderimen baılanys ornatyp, ónimdi jyljytý boıynsha is-sharalar ótkizýge kómektesedi. Eger shyǵarmashylyq ıdeıańyzdy júzege asyrǵyńyz kelse, Alatau Creative HUB-qa qosh keldińiz», dep atap ótti shahar basshysy Saǵyntaev.
Sondaı-aq kreatıvti daryndar aımaǵyna zamanaýı kitaphana, kovorkıng-keńistik, balalarǵa arnalǵan tegin 25 shyǵarmashylyq úıirme, master-klastar men prezentasııalarǵa arnalǵan alań, medıateka kiredi. Úıirmeler arasynda Murat Mutyrǵanovtyń «Sen juldyzsyń» sırk óneri mektebi jáne Dıana Sharapovanyń vokaldyq mektebi bar.
О́nerdiń zamanaýı túrlerinen ózge HAB-ta kreatıvti formatta halyqtyq dástúrlerdi úırenýge bolady. «ArtBit» oqý-kórme ortalyǵynda óner men mádenıettegi jańa tehnologııalarǵa basymdyq berilgen.
Ekinshi qabatta IT-zerthana qurylýda, sonymen qatar munda startaptar men IT-ınkýbator MOST, Element baǵdarlamalaý mektebi, ELTEX radıoelektronıka ortalyǵy, First Lego League robot tehnıkasy mektebi jáne Stenford ýnıversıtetindegi Hasso Plattnerdiń dızaın Instıtýtynyń tájirıbesi boıynsha qurylatyn SDU kompetensııasynyń taqyryptyq ortalyǵy ornalasatyn bolady.
Qala ákimi mundaı ortalyqtar Almatynyń barlyq aýdandarynda qurylatyndyǵyn atap ótti. Keler jyly Almaly aýdanynda jeke ınvestorlar kovorkıng jáne Academie One baǵdarlamalaý mektebi men FIFTY FOUR ('54) bıznes-keńistigi úshin arnaıy úı-jaı daıyndaýda. Bostandyq aýdanynda «TehnoDom» kópsalaly ortalyǵynyń bazasynda IT-startaptarǵa arnalǵan kovorkıng-ortalyq ashylady.
Toqsan saıynǵy esep boıynsha, 2020 jyldyń 9 aıynda Almatyda kórsetilgen qyzmetterdiń jalpy kólemi 1,4 trln teńgeni qurady. Onyń ústine, kreatıvti ekonomıka qyzmetteriniń kólemi 605,6 mlrd teńgege jetip, óńdeý ónerkásibindegi óndiris kóleminen ozyp ótip, 568 mlrd teńgeni qurady.
Kreatıvti ekonomıkaǵa aqparattyq qyzmet, baspa, jarnama, kınofılmder óndirisi, ǵylymı zertteýler, sáýlet, dızaın jáne shyǵarmashylyq qyzmettiń basqa da túrleri kiredi.