Táýelsizdik kúni – biz úshin árqashan tuǵyry bıik, mártebesi joǵary mereke. Ata-babalarymyz armandaǵan maqsatqa biz jetip otyrmyz. Osy jyldar arasynda memleketimiz jańadan boı kóterip, túrli salada jetistikterge jetip otyr.
Árıne, bul jyldar bizge jeńil tımedi. Áleýmettik, ekonomıkalyq, aýylsharýashylyq, qurylys jáne basqa da bar salanyń kirpishin qaıta, jańa baǵytta qaladyq. Sonyń ishinde otandyq medısınaǵa da birshama ózgeris engizdik. 29 jyl ishinde memleketimizdiń qalyptasyp, álemniń betke ustar damyǵan elderiniń qatarynan kóringeni – men úshin maqtanysh.
Osydan birneshe kún buryn Ulttyq ǵylymı medısınalyq ortalyqtyń bir top ǵalymdary kóp jyldyq eńbegi úshin joǵary dárejeli marapatqa laıyq bolyp tanyldy. «Innovasııalyq jasýshalyq tehnologııalardy ázirleý jáne klınıkalyq medısınaǵa engizý» atty jumysymyz ál-Farabı atyndaǵy ǵylym men tehnıka salasyndaǵy memlekettik syılyqqa ıe boldy. Bul jasýshalyq tehnologııanyń paıda bolyp, damýy, onyń qoldanýy, eminiń ádisteri men nátıjeleri kórsetilgen úlken eńbekti qamtıdy.
Búgingi tańda qazaqstandyqtar Eýropa men Azııanyń medısınasy deńgeıinde em ala alatynyn aıta alamyz. Osydan úsh onjyldyq buryn emhanalarda aýrýdy emdeý, onyń aldyn alý jáne dıagnostıkalaýda qoldanylmaǵan tyń qurylǵylar paıda boldy. Bizdiń mamandar sheteldiń úzdik klınıkalarynda biliktiligin arttyryp, oqyp, tájirıbe almasýǵa baryp júr. Osynyń arqasynda otandastarymyz júrekke, mıǵa, jańa týǵan nárestege jasalatyn kúrdeli otalardy teńiz aspaı, óz elimizde jasaı alatyn jaǵdaıǵa jettik.
Bıyl álem medısınasy úshin aýyr jyl boldy. Covid-19 kútpegen jerden paıda bolyp, óz izin qaldyrdy. Degenmen biz oǵan tosqaýyl bola aldyq. Az ýaqyttyń ishinde ortalyqtyń dárigerleri men medbıkeleri kúndelikti jumystarynan aýyp, shuǵyl rejimge qosyldy. Úsh aı boıy olar aýrýhanaǵa túsken árbir naýqasqa joǵary deńgeıde medısınalyq kómek kórsete bildi. Úılerine barmaı, ata-anasyn, jubaılary men jarlaryn, balalaryn kórmeı tynymsyz eńbek etti. Ujymnyń toptyq jumysy arqasynda júzdegen ómir qutqarylyp, naýqastar aman-esen úılerine oraldy.
Pandemııaǵa qarsy kúreste memlekettiń zor qoldaýyn sezindik. Ár bastamamyzdy qoldap, jetispegen medısınalyq qurylǵylardy tez arada satyp alý, jetkizý syndy máselelerde qol ushyn sozdy desek bolady.
Abaı BAIGENJIN,
Ulttyq ǵylymı medısınalyq ortalyqtyń basqarma tóraǵasy,
Ál-Farabı atyndaǵy memlekettik syılyqtyń ıegeri