Táýelsizdik kúni merekesin 30 aqtóbelik otbasy jańa páterlerinde qarsy aldy dep habarlaıdy Egemen.kz
2006 jyldan beri úı kezeginde turǵan kóp balaly, az qamtylǵan otbasylar men múmkindigi shekteýli balalar tárbıelep otyrǵan azamattarǵa qaladaǵy "Qarǵaly" turǵyn úı alabynda jańadan salynǵan №19 jáne №35 úılerden kezeń-kezeńimen páterler berildi. UOS qatysýshysyna teńestirilgen tyl ardagerleri, 1 jáne 2 top múgedekteri men ata-anasyz qalǵan balalar «Nur Aqtóbe» yqsham aýdanyndaǵy toǵyz qabatty úıden bir, eki, úsh bólmeli páterlerge ıe boldy. Jańadan tapsyrylǵan úıler múmkindigi shekteýli azamattardyń óz betimen kirip-shyǵýy úshin yńǵaıly, ásirese kireberiske elektrondy kótergishter ornatylǵan.
О́ńirde áleýmettik osal top ókilderin turǵyn úımen qamtamasyz etýdiń aýqymdy jobalary osylaısha júzege asyp jatyr. «Memleket basshysynyń syndarly saıasatynyń arqasynda el ekonomıkasy qarqyndy damyp, halyqtyń turmys sapasyn arttyrý baǵytyndaǵy áleýmettik baǵdarlamalar júıeli túrde iske asyrylýda. Búgingi kúni Aqtóbe qalasynda 24 myńnan astam adam úı kezeginde tur. 2006 jyly kezekke turǵan azamattarymyzǵa 1 jeltoqsannan bastap jańa aýdandaǵy jańa úılerden baspanalar berile bastaǵanyna ózderińiz kýá bolyp otyrsyzdar. Aldaǵy ýaqytta da bul jumys nátıjeli túrde júzege asyryla beriledi», dedi oblys ákimi Ońdasyn Orazalın páter kiltterin tapsyrý kezinde.
Jańa tapsyrylǵan úılerge múmkindigi shekteýli azamattardyń kirip-shyǵýy úshin yńǵaıly elektrondy kótergishterdi Aqtóbedegi "Pandýs Ok" JShS-iniń sheberleri jasaǵan. Sońǵy jyldary jurtshylyqty qoljetimdi baspanamen qamtamasyz etý maqsatynda qolǵa alynǵan jobalardyń eń aýqymdysy–«Baqytty otbasy –2-10-20» baǵdarlamasy aıasynda osy jyly 3 mlrd teńgege 302 ótinish maquldandy. Al, «Shańyraq – 5-10-20» baǵdarlamasymen 278 otbasy 2,38 mlrd teńgege ıpotekalyq nesıe rásimdegen. Aǵymdaǵy jyldyń 17 tamyzynan beri qolǵa alynǵan "Shańyraq" pılottyq baǵdarlamasy arqyly 1,4 mlrd teńgege 148 qaryz berilgen.
Aıta ketý kerek, Aqtóbe qalasynda jeltoqsannyń sońyna deıin taǵy da 782 turǵynǵa jaldamaly-kommýnaldyq páter kiltteri tabystalady.