Elimizdiń Saýda mınıstrliginde Derekhub.kz arqyly sheshim ázirlendi. Bul áleýmettik mańyzy bar taýarlar men dári-dármekterdiń baǵalaryn jáne baǵany zańsyz kóterý jaǵdaılaryn baqylaýǵa kómektesedi.
Bıznestiń áleýmettik jaýapkershiligi salasyndaǵy derekhub.kz servısi Qazaqstan boıynsha áleýmettik mańyzy bar azyq-túlik taýarlaryna (ÁMAT) jáne dárilik zattardyń baǵalaryna monıtorıng jasaýǵa jáne taldaýǵa múmkindik beredi. derekhub.kz arqyly otandyq bıznesmender men tutynýshylar ÁMAT ózekti baǵalaryn jáne Saýda jáne ıntegrasııa mınıstrligi belgilegen shekti qun normalaryn kóre alady.
«Mundaı platformanyń ıdeıasy pandemııa kezinde taýarlar men dári-dármekterdiń 10-nan 30%-ǵa deıin aıtarlyqtaı qymbattaýy baıqalǵan kezde qalyptasty. Buǵan deıin vedomstvo belgilegen lımıtterde baǵanyń ustalýyn tekserý úshin barlyq óńirdi qamtýǵa múmkindik bermeıtin ishinara tekserýler júrgizý qajet bolatyn. Endi bul úshin biz ázirlegen servısti paıdalaný jetkilikti», dedi Saýda jáne ıntegrasııa mınıstrliginiń Ishki saýda departamenti dırektorynyń orynbasary Erlan Eshnazarov.
Saýda jáne ıntegrasııa mınıstrligi bıznesti, saýda obektilerin osy bastamalarǵa erikti negizde qatysýǵa shaqyrady. Onyń sheńberinde platformaǵa qatysýshy kompanııalar zańdy máseleler boıynsha bıznesti qoldaýdyń tegin jedel jelisine jáne mınıstrliktiń ataýly sertıfıkattaryna, sondaı-aq ÁMAT naryqtyq baǵalary boıynsha turaqty taldamalyq esepterge, bultty fıskaldyq quralǵa jáne dosmart nıettestik kartasyna tegin jazylýǵa, kepilsiz kredıt ónimderine jáne Alfa bankten tólem quraldaryna qol jetkize alady. Sondaı-aq vedomstvo tarapynan jyldyń áleýmettik jaýapty kásipkerlerine «Adal satýshy» («Trusted businnes») atalymy beriledi.
Platforma qanatqaqty rejimde iske qosyldy. Kásipkerler baǵalardy júkteı alady jáne tarıhty jeke kabınetten kóre alady. Rıteıl-analıtıka olarǵa tegin tolyq kólemde qoljetimdi bolady.