Memleket basshysy Qasym-Jomart Toqaev Xinjiang Lihua kompanııasy dırektorlar keńesiniń tóraǵasy Chjan Sıhaıdy qabyldady, dep habarlaıdy Egemen.kz Aqordanyń málimetine silteme jasap.
Kezdesý barysynda Qazaqstanda tolyq óndiristik sıkl jolǵa qoıylǵan maqta-mata klasterin júzege asyrý máselesi talqylandy.
Prezıdentke jobanyń ımportqa táýeldilikti aıtarlyqtaı azaıtyp, ishki naryqty básekege qabiletti otandyq ónimdermen qamtamasyz etýge múmkindik beretini jóninde baıandaldy.
Chjan Sıhaı Qasym-Jomart Toqaevqa búginde birneshe nysan, sonyń ishinde eki maqta óńdeý zaýyty qoldanysqa berilgenin aıtty.
Taıaý jyldary sıntetıkalyq mata materıaldaryn, toqyma jáne kıim óndiretin nysandardy iske qosý josparlanyp otyr.
Jobany júzege asyrý arqyly maqta egistigin 52 gektarǵa deıin ulǵaıtýǵa bolady. Egin sharýashylyǵyna sıfrlyq tehnologııalar men tamshylatyp sýarý sekildi ınnovasııa paıdalanylady.
Maqta-mata klasteriniń alǵashqy kezeńinde 360 mıllıon dollarǵa jýyq tikeleı sheteldik ınvestısııa tartylyp, 4 myńnan asa jumys orny ashylmaq.
Memleket basshysy klaster elimizdiń ońtústik óńirinde agroónerkásip keshenin jáne jeńil ónerkásipti damytý turǵysynan mańyzdy ekenin atap ótti.
Prezıdenttiń pikirinshe, jergilikti turǵyndar arasynan bilikti maman daıarlaý isine mán berý kerek.
Qasym-Jomart Toqaev sý únemdeý tehnologııalaryn keńinen paıdalanýdyń ózektiligine nazar aýdardy, sondaı-aq maqta óndirisiniń shyǵynyn eskere otyryp, atalǵan salaǵa «aqyldy» sıfrlyq sheshimder men jasandy ıntellektini engizýdi quptady.
Memleket basshysy Qazaqstannyń agroónerkásip keshenin damytýǵa aıryqsha úles qosqany úshin Chjan Sıhaıdy II dárejeli «Dostyq» ordenimen marapattady.