Almaty ákimi Baqytjan Saǵyntaev jumys sapary barysynda «Isker ana» jobasyn júzege asyrý jáne «Zerdeli» yqshamaýdanyndaǵy problemalyq máselelerdi sheshý úshin Alataý aýdanynyń turǵyndarymen kezdesti, dep habarlaıdy Egemen.kz.
Alataý aýdanyndaǵy «Baqytty otbasy» áleýmettik qoldaý ortalyǵynyń bazasynda júzege asyrylǵan «Isker ana» jobasyna qatysýshy kópbalaly analarmen kezdesý kezinde qala ákimi názikjandy eńbekkerlerdiń jetistikterine qyzyǵýshylyq bildirdi.
Alataý aýdanyndaǵy «Baqytty otbasy» ortalyǵynyń jetekshisi Aqmaral Basırova aǵymdaǵy jyly 25 myńǵa jýyq áıeldiń túrli sheberlik kýrstarynda bilim alǵandaryn aıtty. Qazirdiń ózinde olardyń kópshiligi tabysty isker jandarǵa aınalǵan.
«Kúrdeli jaǵdaılarǵa tap bolǵan kóptegen áıelderdiń ómiri bizdiń kóz aldymyzda ózgerýde. Qıyndyqtarǵa qaramastan, olar óz kúshterine senedi ári jańa isterdi ıgerýge ýaqyt ta tabady», - deıdi A. Basırova.
Shahar basshysy «Isker ana» baǵdarlamasynyń kópbalaly analardy qoldaýǵa baǵyttalǵanyn eske saldy. Olar «Baqytty otbasy» aýdandyq ortalyqtarynyń bazasynda «Eńbek» memlekettik baǵdarlamasy aıasynda kásipkerlik negizderin oqyp-úırenedi. Kópbalaly otbasylardan shyqqan 888 adam 555 myń teńgege deıin grant aldy. Olardyń 557-si ózderiniń jeke kásipterin ashty. Taǵy 203 kópbalaly ana 5 mıllıon teńgege deıin grant aldy, onyń jalpy somasy 406 mln teńge.
B. Saǵyntaevtyń aıtýynsha, aǵymdaǵy jyly granttardyń jalpy somasy 200% -ǵa ulǵaıyp, 700 mln teńgeni qurady.
«Baǵdarlama suranysqa ıe jáne naqty nátıjelerdi kórsetýde. Sizdermen kezdeskennen keıin men buǵan taǵy da kóz jetkizdim. Ákimdik kópbalaly analar arasynda kásipkerlikti damytýǵa qoldaý kórsetýdi jalǵastyrady. Jeńildetilgen jalǵa beriletin úı-jaılardy, mysaly, shaǵyn óndiristik parkterde oryndardy alýǵa kómektesemiz. Bulardan ózge, granttarǵa bólinetin somany ulǵaıtý múmkindigin qarastyramyz», - dedi B. Saǵyntaev.
«Zerdeli» yqshamaýdanynyń turǵyndarymen áńgime barysynda qala ákimi kóterilgen máselelerdiń nazardan tys qalmaıtynyn atap ótti. Sonyń biri — «kiristirý» dep atalatyn josparlanǵan qurylys, ıaǵnı turǵyn úılerge irgeles jatqan ýchaskelerde qurylys júrgizý.
Yqshamaýdannyń belsendi turǵyndarynyń biri Dana Rahımova turǵyndardyń «kiristirý» qurylystarynan qaýiptenetinin aıtty. Onyń bul sózine Almaty ákimi B. Saǵyntaev óziniń tapsyrmasy boıynsha Jer qatynastary basqarmasynyń osyndaı jeti ýchaskeni memleket menshigine qaıtarý máselesin qarap jatqanyn jetkizdi.
«Bul ýchaskeler irgeles salynǵan úıler turǵyndarynyń tilekterine saı abattandyrylýy tıis. Múmkin munda oıyn, sport nemese balalar alańdary qajet shyǵar», - dep atap ótti B. Saǵyntaev.
Áńgime barysynda ákim Alataý aýdanyn damytýǵa erekshe nazar aýdarylatynyn, onyń ortalyqtandyrý qaǵıdaty boıynsha júzege asyrylatynyn aıtyp berdi.