Give Me Sport basylymy HHI ǵasyrdaǵy eń úzdik 50 kásipqoı boksshynyń tizimin jarııa etti. Solardyń qatarynda bizdiń Gennadıı Golovkın de bar.
Bul kúnderi orta salmaqta kúsh synasyp júrgen 38 jastaǵy qazaqstandyq boksshy úshinshi orynǵa jaıǵasty. Árıne, tańdanýǵa bolaıdy. Kásipqoı rıngte judyryqtasyp júrgenine 15 jylǵa jýyqtan qalǵan GGG barlyǵy 43 kezdesý ótkizip, 41 ret jeńiske jetti. 36 qarsylasyn nokaýtqa jiberdi. Bir ret utylyp, bir básekede teń esep tirkeldi.
Gennadıı Golovkınniń aldyn tek Mennı Pakıao men Floıd Meıvezer ǵana orap tur. 42 jastaǵy Fılıppınniń ókili shırek ǵasyrdan asa ýaqyt boıy sharshy alańdy armansyz shaıqap keledi. Sol aralyqta 71 ret jekpe-jek ótkizgen Pakıao tek jeteýinde ǵana utyldy (62 jeńis, 2 teń). 39 kezdesýdi merziminen buryn aıaqtady. Al 43 jastaǵy AQSh-tyń sańlaǵy Meıvezer 1996 jyldan beri 50 básekesiniń barlyǵyn óz paıdasyna sheshti.
Sondaı-aq «TOP-10» boksshynyń qataryna Roı Djons, Vladımır Klıchko, Saýl Alvares, Lennoks Lıýıs, Oskar de la Hoıa, Bernard Hopkıns jáne Djo Kalzage syndy sańlaqtar enip otyr.