Astrahan oblysyna jumys saparynyń barysynda Qazaqstannyń Reseıdegi Elshisi Ermek Kósherbaev óńirdiń gýbernatory Igor Babýshkınmen kezdesti, dep habarlaıdy Egemen.kz.
Taraptar búkil yntymaqtastyq aýqymy boıynsha keń kólemdegi máselelerdi talqylap, shekara mańyndaǵy ózara is-qımylǵa erekshe nazar aýdardy.
I. Babýshkın Qazaqstandy Astrahan oblysynyń negizgi sheteldik seriktesteriniń biri dep atady. Qazirgi ýaqytta yntymaqtastyq san alýan baǵyttarda: saýda, ónerkásip, kólik, logıstıka, mádenıet, týrızm, medısına jáne bilim berý boıynsha júrgiziledi.
Gýbernator sonymen qatar Astrahan oblysynda osy óńirde ǵasyrlar turyp kele jatqan ult ókilderiniń arasyndaǵy beıbitshilikti, kelisim men ózara túsinýshilikti damytýǵa kóp kóńil bólinetinin eske salyp ótti. Qazaqtar asa iri etnıkalyq qaýym bolyp tabylady jáne Reseıdegi qazaqtardyń basqa óńirlik qaýymdary arasynda san jaǵynan birinshi orynda.
Kezdesýge qatysýshylar ekijaqty baılanystardyń áleýeti áli de sarqylmaǵanyn jáne olardy arttyrý úshin jaqsy múmkindikterdiń bar ekendigin atap ótti. Keleshegi mol baǵyttardyń arasynda – Astrahanda shekara mańyndaǵy saýda ortalyǵyn qurý, ózara ónim jetkizýdi arttyrý, Qazaqstannan keme qurylysyna tapsyrystar tartý, Kaspııde jańa krýızdik baǵyttar ashý.
Gýbernator óńirde kemejaılyq erekshe ekonomıkalyq aımaq qurý, «Soltústik – Ońtústik» kólik dálizin damytý týraly aıtyp berdi jáne qazaqstandyq bızneske jobaǵa belsendi túrde qatysýdy usyndy.
Elshi pandemııa kezinde kórsetilgen kómek úshin óńir basshysyna alǵys bildirdi. Ol Astrahan oblysy birinshi bolyp kómek usynyp, tek qorǵanysh quraldary men dári-dármek qana emes, sonymen qatar tájirıbeli dárigerlerdi de jibergenin atap ótti. Elshi sonymen qatar gýbernatorǵa usynylǵan taıaýdaǵy ýaqyttarda Qazaqstanǵa kelýge shaqyrýdy rastady.
Bıyl COVID-19 pandemııasy saldarynan Qazaqstan men Reseıdiń О́ńiraralyq yntymaqtastyq forýmynyń aýystyrylǵanyna qaramastan, kezdesýge qatysýshylar týyndaǵan mindetterdi aǵymdaǵy fors-majorlyq jaǵdaılardyń ózinde sheshý qajettigin jáne olardy sheshý joldaryn birlesip izdeý kerektigin atap ótti.
Astrahandaǵy joǵary oqý oryndarynda bilim alyp jatqan qazaqstandyq stýdenttermen kezdesýdiń barysynda Elshi olardyń pandemııa jaǵdaılarynda Reseıde bolýy men bilim alýlarynyń ártúrli aspektilerin talqylap, otandastarymyzdyń suraqtaryna jaýap berdi. Qazirgi ýaqytta óńirdegi joǵary oqý oryndarynda 1800-ge jýyq Qazaqstan azamaty oqıdy.
Sapar sheńberinde Elshi sonymen qatar Astrahan qalasynyń Baýyrlastar baǵyndaǵy «Máńgilik alaý» memorıalyna gúl qoıdy. Ol nemis fashısteriniń basqynshylyǵyna qarsy birlesken kúresti este saqtaýdyń jáne jastardy ata-baba erlikteriniń úlgisinde tárbıeleýdiń mańyzdylyǵyn atap ótti.