Oral qalasyndaǵy fızıka-matematıka baǵytyndaǵy Nazarbaev zııatkerlik mektebinde «Ádistemelik laıfhak» atty sıfrly forým ótti, dep habarlaıdy Egemen.kz.
Bilimdi transformasııalaý, mekteptegi sıfrly orta, oqýshy belsendiligin arttyrý, zamanaýı muǵalimge qoıylatyn jańa talap sekildi máselelerdi talqylaǵan jıynǵa otandyq jáne sheteldik mamandar onlaın rejimde qatysty.
«Bul forým qashyqtan oqytý kezinde muǵalimderdi qoldaý boıynsha júıeli jumys nátıjesin kórsetti. Onyń ústine bizdiń mektep bastamasymen júzege asqan «Jańa zaman muǵalimine arnalǵan sıfrly gaıd» jobasy kezeńderiniń biri boldy. Sıfrly quraldar pedagogter úshin oqý prosesin tıimdi uıymdastyrý jáne oqýshylardyń boıynda HHI ǵasyr daǵdylaryn damytýdyń zamanaýı ádisine aınalyp otyr», deıdi mektep dırektory Aıdarbek Aıtpýkeshev.
Forýmda «Nazarbaev qorynyń» bilim berý salasyndaǵy bas sarapshysy Názıpa Aıýbaeva qashyqtan oqytý kezeńinde muǵalimniń refleksııalyq praktıkasynyń mańyzyn atap ótti. Sonymen qatar pedagogterdiń mektep ishindegi kásibı damýy oqýshylardyń bilim alýyna tıimdi áser etetinin jetkizdi. EdCrunch University NITÝ «MISıS» ortalyǵynyń dırektory Nurlan Qııasov sıfrly alshaqtyqty qaıta qarastyrý, tehnologııany passıv qoldanýdan belsendi paıdalanýǵa kóshý jáne mekteptegi sıfrly bilim berý ortasyn qalyptastyrý erekshelikterin eskerýge shaqyrdy.
Bilim berýdi transformasııalaý taqyrybyndaǵy paneldi pikirtalasta Qazan qalasyndaǵy A.N.Týpolev atyndaǵy QUZTÝ janyndaǵy ınjenerlik lıseı dırektorynyń orynbasary Indır Halıkov, Oraldaǵy pedagogıkalyq sheberlik Ortalyǵy menedjer-ádiskeri Gúlnara Esmaǵulova jáne Jahansha Dosmuhamedov atyndaǵy joǵary pedagogıkalyq kolledj dırektorynyń orynbasary Zınýr Muhtar baıandama jasady. Forýmǵa qatysýshylar ártúrli zamanaýı resýrstardyń ishinen tıimdi sıfrly quraldy qalaı tańdaýǵa bolady, eńbek naryǵy aldaǵy jyldarda qalaı ózgeredi, vırtýaldy álem shynaıy álemge qalaı áser etedi, tabysty oflaın jobany tabysty onlaınǵa qalaı aınaldyrýǵa bolady jáne qazirgi tańdaǵy muǵalimderdiń praktıkasyndaǵy basqa da ózekti máselelerdi talqylady.
«Sıfrly gaıd» laıfhaktar pavılonynda Zııatkerlik mekteptiń úzdik muǵalimderi Pear Deck, LINOIT onlaın taqtasy, CLASSTIME, WORDWALL, Mindmeister servısteri sııaqty onlaın-platformalar, paıdaly veb-saıttar, laıfhaktar men utymdy sheshimderdi tanystyryp, olardyń sabaqta tıimdi qoldanylýyn kórsetti. «Sandyq sabaq» sessııasynda oblystyq jalpy orta mektep muǵalimderi poster túrinde zertteýlerin usyndy.
Forým sońynda NIS muǵalimderiniń AKT daǵdylaryn damytý, qashyqtan oqytýdyń ozyq tájirıbesin taratý jáne muǵalimderdiń shyǵarmashylyq bastamasyn damytý maqsatynda uıymdastyrylǵan «Úzdik onlaın-sabaq» kásibı sheberlik baıqaýynyń qorytyndysy belgili boldy.
«Qazirgi zaman sabaǵy – muǵalimniń monology emes, pikirtalas, zertteý men tájirıbe alańy. Muǵalim jetekshilik etedi, yntalandyrady, belsendi oqýǵa jaǵdaı jasaıdy. Sol sebepti muǵalimderdiń kásibıligine qoıylatyn talaptar da artyp keledi. Sondyqtan olar zamanaýı oqytý ádisterin qoldana bilýi kerek. Búgingi forýmǵa qatysýshylar osyndaı ortaq pikirge keldi», deıdi Oral qalasyndaǵy Nazarbaev Zııatkerlik mektebiniń ókili Aıdana Hamıdýllına.