Búgin Jalaǵash aýdanyna barǵan oblys ákimi Gúlshara Ábdiqalyqova Dáýimbaı ýchaskesindegi bir páterli úsh bólmeli nesıelik 10 turǵyn úıdi paıdalanýǵa berý jáne jańadan salynǵan 100 tósektik aýdandyq aýrýhananyń ashylý rásimine qatysty, dep habarlaıdy Egemen.kz.
Sharada aýdandyq qoǵamdyq keńestiń tóraǵasy Kenjeǵara Súleımenov aýdanda atqarylyp jatqan jumystarǵa oń baǵasyn berip, qoldaý tanytqan aımaq basshysyna alǵysyn aıtty.
Budan soń Gúlshara Ábdiqalyqova jańadan salynǵan aýdandyq aýrýhananyń ashylý saltanatyna qatysty. Aımaq basshysy zamanaýı medısınalyq mekeme halyq ıgiligi úshin qyzmet eterine senim bildirdi.
«Búgin aýdan turǵyndary úshin qýanyshty jańalyq turǵyn úı men aýdandyq aýrýhananyń paıdalanýǵa berilýi. Jańa páter ıelerin qonys toıymen quttyqtaımyn! Al, jańa úlgide salynǵan aýrýhana el ıgiligine qyzmet etedi dep senemin»!, dedi oblys ákimi.
Saltanatty sharada densaýlyq salasynyń ardageri Turǵanbaı Mahanov pen memleket jáne qoǵam qaıratkeri Qojahmet Baımahanov sóz sóılep, turǵyndardy quttyqtady.
Aýdandyq aýrýhananyń qurylysy 2019 jyly bastalǵan. Merdiger mekeme «ABÝ-SER» JShS. Joba quny 4 mlrd.teńge. Nysannyń jalpy aýmaǵy – 3,6 gektar, tıptik jobada salynǵan. Aýrýhanada 94 dáriger, 446 orta býyn qyzmetker jumys isteıdi.
Ústimizdegi jyly aýdanda memlekettik baǵdarlamalar sheńberinde Jalaǵash kentinde emhana ǵımaratyn balabaqsha etip qaıta jańǵyrtý, ortalyq alańdy abattandyrý, Aqsý eldi mekenine kire beris aýdandyq mańyzy bar avtomobıl joldaryn, ishki kóshelerdi jaryqtandyrý, 200 oryndyq oqýshylar úıi men 50 oryndyq óner mektebiniń qurylysyn júrgizý, M.Shámenov aýylyndaǵy sport alańyn aǵymdaǵy jóndeýden ótikizip, 140 oryndyq №34 orta mektep qurylysyn salý, Aqqyr aýylyndaǵy №188 orta mektep ǵımaratyn kúrdeli jóndeýden ótkizý sekildi aýqymdy jumystar atqarylýda.
Jumys sapary sońynda aımaq basshysy Gúlshara Ábdiqalyqova aýdan ákimi Asylbek Shámenovke epıdemıologııalyq ahýaldy baqylaýda ustaý jáne ınfraqurylym jumystaryn sapaly júrgizý jóninde birqatar tapsyrma berdi.