Sońǵy kezderi Qaraǵandy qalasynda belgisiz bireýlerdiń sheteldik avtokólikterdiń memlekettik tirkeý nómirlerin urlap, keıin olardy qaıtaryp berý úshin aqsha talap etetini týraly shaǵymdar jıilep ketken bolatyn. Osy dabyldyń negizinde Qaraǵandy oblystyq Polısııa departamentiniń basshylyǵy kúdikti tulǵalardy ustaý maqsatynda túngi jedel-izdestirý toptaryn qurdy. Sebebi tirkeý nómirlerin urlaý oqıǵalary kóbine túngi mezgilde jasalyp kelgen edi.
Tártip saqshylary urlyq faktilerine taldaý jasaǵan kezde qylmystyq oqıǵalardyń kóbine Qaraǵandy qalasynyń ońtústik-shyǵys aýmaǵynda bolatynyn anyqtady. Sondyqtan osy shaǵyn aýdanǵa basa nazar aýdarylǵan. Kóp keshikpeı, kúndelikti keshendi is-sharalardy jedel ári saýatty túrde júrgizgendiktiń arqasynda polısııa qyzmetkerleri oń nátıjege qol jetkizdi. Bul týraly Qaraǵandy oblystyq Polısııa departamentiniń bastyǵy, polısııa polkovnıgi Erlan Faızýllın málimdedi.
– 8 jeltoqsanda saǵat tańǵy 05.00-diń shamasynda Qaraǵandy qalalyq polısııa basqarmasynyń krımınaldyq polısııa qyzmetkerleri júrgizgen jedel izdestirý is-sharalary barysynda Iаzev kóshesinde ornalasqan úılerdiń aýlasynda turǵan kólikterdiń birinen tirkeý nómirin sheship jatqan 18 jáne 20 jastaǵy eki er adam ustaldy. Tekserý barysynda olardan avtokólikterdiń toǵyz nómiri tárkilenip alyndy. Sondaı-aq ustalǵandar Qaraǵandy qalasynda avtokólikterden tirkeý nómirlerin urlaýdyń 29 faktisin moıyndady, – dedi óńirdiń bas polıseıi.
Qazirgi ýaqytta atalǵan oqıǵa boıynsha Qylmystyq kodekstiń 194-baby, 2-tarmaǵyna sáıkes qylmystyq is qozǵalyp, tergeý amaldary júrgizilýde.
Osyǵan oraı Qaraǵandy oblystyq Polısııa departamentiniń bastyǵy avtokólik ıelerine úndeý joldap, eger memlekettik tirkeý nómirleri qoldy bolsa, birden polısııaǵa telefon soǵyp, habarlaýǵa shaqyrdy. Sonymen qatar ol urlanǵan nómirler úshin belgisiz bireýlerge aqsha berýge nemese aýdarýǵa bolmaıtynyn taǵy da eske saldy.
Qaraǵandy oblysy