Búgin Májilis Tóraǵasy Nurlan Nyǵmatýlın Palatanyń 2020 jylǵy sońǵy jalpy otyrysyn ótkizip, qorytyndy nátıjelerge toqtaldy, dep habarlaıdy Egemen.kz.
Palata Tóraǵasy atap ótkendeı, depýtattyq korpýstyń jumysy tolyqtaı Tuńǵysh Prezıdentimiz, Elbasy Nursultan Ábishuly Nazarbaevtyń strategııalyq tapsyrmalaryn jáne Memleket Basshysy Qasym-Jomart Kemeluly Toqaevtyń bastamalaryn, sondaı-aq halyqqa Joldaýyn sapaly zańdarmen qamtamasyz etýge arnaldy. Onyń ishinde, áleýmettik qorǵaý, densaýlyq saqtaý, bilim, shaǵyn jáne orta bıznesti qoldaý, ekologııalyq jaǵdaıdy jaqsartý negizgi baǵyttardyń biri bolǵanyn alǵa tartqan Nurlan Nyǵmatýlın, qabyldanǵan barlyq Zańdar halqymyzdy áleýmettik qoldaýǵa, elimizdi odan ári damytýǵa yqpal etetinin jetkizdi.
Tutastaı alǵanda, osy shaqyrylym barysynda Parlament Palatalarynyń 23 birlesken otyrysy, Májilistiń 1208 másele qaralǵan 186 jalpy otyrysy ótken. Osy ýaqyt ishinde Palatanyń qaraýynda 487 zań jobasy bolyp, onyń 432-si maquldanyp, Senatqa joldandy. Al, búgingi tańda 391 zań jobasyna Memleket Basshysy qol qoıdy. Taǵy erekshe aıta ketetin jaǵdaı, Májilis depýtattary osy shaqyrylymda 60 zań jobasyna ózderi bastamashy boldy.
Sondaı-aq, Májilis «Halyq densaýlyǵy jáne densaýlyq saqtaý júıesi týraly», «Ekologııalyq kodeks», «Ákimshilik rásimdik-prosestik kodeks» jáne Salyq jáne bıýdjetke tólenetin basqa da mindetti tólemder týraly (Salyq kodeksi), sondaı-aq, Kedendik retteý jáne Jer qoınaýy jáne jer qoınaýyn paıdalaný týraly alty mańyzdy kodeksti qabyldady. Sonymen qatar, Májilis Tóraǵasy Nurlan Nyǵmatýlın shaqyrylym barysynda «Nur Otan», «Aq jol», «Halyq kommýnısteri» partııalarynyń fraksııalary men Qazaqstan halqy Assambleıasynyń depýtattyq toby belsendi jumys istegenin aıta kelip: - Erekshe aıtý kerek, bizdiń depýtattyq korpýs elde qalyptasqan jaǵdaı kezinde de, karantın kezinde óz jumysyn bir kúnge toqtatqan joq. Qaıta, zamanǵa saı tehnologııalardy paıdalanyp, tıimdi jumys jasadyq, - dedi Nurlan Nyǵmatýlın. Májilis qyzmeti barysynda halyq kótergen naqty máselelerdi sheshýge únemi kóńil bólip keledi. Osy bes jyl ishinde májilismender 1150 depýtattyq saýal joldap, turǵyndardan 23 700-ge jýyq hat kelip, tıisti jaýaby qaıtarylǵan.
Sondaı-aq, depýtattar óńirlerdi aralap, 17 myńnan astam kezdesýler uıymdastyryp, 1 mln.astam halyqpen kezdesýler ótkizdi. Nurlan Nyǵmatýlın altynshy shaqyrylymdaǵy Parlament Májilisiniń jumysy ashyq ta nátıjeli bolǵanyn atap ótip, zań jobalaryn talqylaıtyn jumys toptarynyń quramyna parlamenttik emes partııalardyń, úkimettik emes uıymdar men qoǵamdyq birlestikterdiń ókilderi shaqyrylatynyn atap ótip, Májilistiń jalpy otyrystary, komıtetterdiń jıyndary bedeldi aqparattyq saıttarda, portaldarda onlaın túrde kórsetiletinine toqtaldy.
Otyrysty qorytyndylaǵan Májilis Tóraǵasy depýtattarǵa elimizdiń zańnamalyq bazasyn jetildirip, otandyq parlamentarızmdi damytýǵa qosqan eleýli úlesteri úshin, sondaı-aq, zań shyǵarý prosesine belsendi aralasqan barlyq memlekettik organdardyń, azamattyq qoǵamnyń, saraptamalyq qoǵamdastyqtyń ókilderine alǵysyn bildirdi.