Jańa jyl qarsańynda Oral qalasyndaǵy 5517 Ulttyq ulan áskerı bólimi qyzmetkerleri ujymdaǵy kóp balaly otbasy balalaryna jańajyldyq syılyq taratty, dep habarlaıdy Egemen.kz
«Karantınge baılanysty biz balalardy jınap, shyrsha merekesin ótkize almadyq. Alaıda kóp balaly áskerı qyzmetshilerdiń otbasyndaǵy 30-dan astam balanyń úıine baryp, arnaıy quttyqtadyq. Olarǵa tátti syılyq, azyq-túlik jıyntyǵyn jetkizdik. Bul balalar – erteńgi memlekettik qyzmetkerler, ǵaryshkerler, ártister, dárigerler, áskerı qyzmetkerler ǵoı. Sondyqtan jas urpaq úshin barlyq jaǵdaıdy jasaý bizdiń, eresekterdiń basty mindeti», deıdi 5517 áskerı bóliminiń komandıri podpolkovnık Erbol Antaı.
Ásker kıimin kıgen kómekshilerin ertken Aıaz ata men Aqshaqardy búldirshinder qýana qarsy aldy. Jattap alǵan taqpaqtary men óleńderin jarysa aıtyp, Aıaz atanyń qorjynynan shyqqan syılyqqa máz bolysty.
– Jańa jyl qarsańynda áskerı qyzmetshilerdiń balalardy quttyqtaýy – bizdiń bólimde jyl saıyn qaıtalanatyn dástúrge aınalǵan. Buǵan balalar da, olardyń ata-analary da erekshe qýanady. Kele jatqan jańa jyldyń qýanyshty jáne baqytty sátteri kóp bolsyn! – deıdi 5517 áskerı bólimdegi áıelder keńesiniń tóraıymy serjant Zyıha Orazaeva.