Memleket basshysy elimizdiń bas basylymy «Egemen Qazaqstan» gazetine jarııalanǵan maqalasynda táýelsiz el bolý ony jarııalaýmen nemese memlekettiń irgetasyn qalaýmen ǵana shektelmeıtinin aıtty, - dep habarlaıdy Egemen.kz
«Biz ne istesek te, bárin keler urpaq úshin jasaımyz. Memlekettik saıasattyń bolashaq aldyndaǵy jaýapkershiligin tereń sezinemiz. Bul ustanymnan eshqashan aınymaımyz. Eń ǵajaıyp erlikter Otanǵa sheksiz súıispenshilikten týyndaıtyny sózsiz. Shyn otansúıgishtik degenimiz – jalań uran tastaý emes, elińe, halqyńa qyzmet etý», - deıdi el Prezıdenti.
Qazaqstan Prezıdenti adam balasy dúnıege patrıot bolyp kelmeıtinin, ol tek bilim men tárbıe alyp, áleýmettik ortamen aralasyp, azamattyq bolmysyn qalyptastyrý kezinde patrıotqa aınalatynyn eske salyp ótti.
«О́ziniń jeke maqsat-múddeleri qoǵam ıgiligimen úndesip, eliniń damýyna eleýli úles qosyp jatqanyn jan-júregimen sezingen adam naǵyz baqytqa keneledi. Halqymyzdyń birtýar perzenti Álıhan Bókeıhanov «Ultqa qyzmet etý bilimnen emes, minezden» degen. Biz shynaıy patrıottyq sezimmen rýhtanyp, qasıetti Táýelsizdigimizdi odan ári nyǵaıta túsý úshin birlese jumys isteýimiz kerek. Barsha otandastaryma, ásirese, jastarǵa aıtarym: keń baıtaq Qazaqstandy asqaq armandaryń men batyl josparlaryńdy emin-erkin júzege asyra alatyn, tabysyńa marqaıyp, árdaıym tileýińdi tileıtin qasıetti Otanyń retinde baǵalańdar! Men jańa Qazaqstan patrıotızminiń jasampazdyq qudiretine senemin. Táýelsiz el bolý ony jarııalaýmen nemese memlekettiń irgetasyn qalaýmen shektelmeıdi», - deıdi Memleket basshysy.
Sonymen birge Prezıdent táýelsizdik úshin naǵyz kúres kúndelikti eńbekpen, úzdiksiz ári dáıekti eldik saıasatpen máńgi jalǵasatyn basa aıtty.
«Biz qýatty táýelsiz memleketimizben ǵana ult retinde jer betinde saqtalamyz. Osy aınymas aqıqatty berik ustanýymyz qajet. «Táýelsizdik bárinen qymbat!» degen bir aýyz sóz máńgi uranymyz bolýǵa tıis. Ultymyzdyń uly ustyny – qasterli Táýelsizdigimiz barsha jurtymyzdyń patrıottyq rýhymen asqaqtaı bersin!», - deıdi Prezıdent Q.Toqaev.