Eńbek jáne halyqty áleýmettik qorǵaý mınıstrligi 5 qańtardan bastap enbek.kz portaly arqyly halyqty jumyspen qamtý ortalyqtarynyń qyzmetterin qashyqtyqtan ala alatyn qalalardyń tizbesin keńeıtti, dep habarlaıdy Egemen.kz.
Budan buryn habarlanǵandaı, 2020 jylǵy 17 qarashada jumyssyzdardy tirkeý rásimderin ońaılatý jáne jumyspen qamtýdy qoldaý boıynsha memlekettik qyzmetterdi alýdy jeńildetý úshin Eńbekmıni respýblıkalyq mańyzy bar qalalar men oblys ortalyqtarynyń turǵyndary úshin elektrondyq eńbek bırjasy arqyly HJQO qyzmetterin qashyqtyqtan kórsetý boıynsha pılottyq jobany iske qosty.
EEB-daǵy «jeke kabınette» qazaqstandyqtar jumys izdep júrgen adam nemese jumyssyz retinde esepke turyp, tirkeýdiń barlyq kezeńderin qadaǵalaı alady. Jumyssyz mártebesin alǵannan keıin azamattar onlaın rejıminde EEB-da jumysynan aıyrylý boıynsha áleýmettik tólemge ótinim jibere alady jáne memleket sýbsıdııalaıtyn jumys oryndaryna – jastar praktıkasyna, áleýmettik jumys oryndaryna, qoǵamdyq jumystarǵa bos jumys oryndaryn óz betinshe tańdaı alady. Joǵaryda kórsetilgen qyzmetterdi onlaın rejımde alý úshin elektrondyq sıfrlyq qoltańbany paıdalana otyryp, EEB-da tirkeýden ótý qajet.
Qyzmetterdi qashyqtyqtan alý múmkindigin 1400-den astam adam paıdalanyp úlgerdi. 1015 azamat jumyssyz mártebesin aldy. 260-tan astam jumyssyz adam jumysynan aıyrylǵan jaǵdaıda áleýmettik tólemder alýǵa ótinimder jiberdi, olardyń 80%-yn Memlekettik áleýmettik saqtandyrý qory maquldady.
«Jumys izdep, jumyspen qamtý ortalyǵyna barǵysy keletin azamattarǵa úıden shyǵýdyń qajeti joq. Munyń bárin birneshe mınýt ishinde Enbek.kz portalynda jasaýǵa bolady ol úshin tek ınterneti bar kompıýter men elektrondyq sıfrlyq qoltańba bolýy kerek. Qyzmet tolyqtaı avtomattandyrylǵan. Bul degenimiz, eger úsh jumys kúni ishinde portal jumys izdeýshi adamǵa laıyqty jumys taba almasa, onda elektrondyq eńbek bırjasy jumyssyz retinde tirkeýdi avtomatty túrde júzege asyrady. Osylaısha, adam faktory tolyǵymen joıylady», – dedi Eńbek jáne halyqty áleýmettik qorǵaý vıse-mınıstri Erbol Ospanov.
Internet nemese kompıýter bolmaǵan jaǵdaıda, barlyq jumyspen qamtý ortalyqtarynda qurylǵan ózine-ózi qyzmet kórsetý aımaqtarynda EEB arqyly qyzmetterdi alýǵa bolady. HJQO qyzmetkerleri onlaın usynylatyn qyzmetter boıynsha qajetti keńester beredi. Bul azamattarǵa jumyspen qamtý ortalyǵynyń mamanyna qabyldaýǵa kezek kútpeýge jáne COVID-19 pandemııasy jaǵdaıynda adamdardyń baılanysyn azaıtýǵa múmkindik beredi.
«2021 jylǵy 5 qańtardan bastap EEB arqyly onlaın qyzmet kórsetý mehanızmi oblystyq mańyzy bar taǵy 23 qalada halyqqa qoljetimdi bolady. Al jyldyń ekinshi jartysynda Qazaqstannyń barlyq turǵyny jańa servısterdi paıdalana alady. Sondaı-aq, azamattar úshin elektrondyq eńbek bırjasynda jumyspen qamtý salasyndaǵy qyzmetter tizbesi únemi keńeıtiletin bolady», – dep tolyqtyrdy Erbol Ospanov.
EEB arqyly HJQO qyzmetteri endi Nur-Sultan, Almaty, Shymkent qalalarynyń, barlyq oblys ortalyqtarynyń, sondaı-aq Stepnogorsk, Tekeli, Qapshaǵaı, Kýrchatov, Rıdder, Semeı, Qarajal, Sátbaev, Prıozersk, Jezqazǵan, Temirtaý, Balqash, Shahtınsk, Saran, Arqalyq, Lısakov, Rýdnyı, Baıqońyr, Jańaózen, Aqsý, Ekibastuz, Arys, Kentaý qalalarynyń turǵyndary úshin qoljetimdi.
Onlaın qyzmet kórsetý týraly tolyq aqparatty www.enbek.kz saıtynda jáne halyqty jumyspen qamtý ortalyǵynda alýǵa bolady.