Qazaqstandyq joǵary oqý oryndarynyń 2020 jylǵy reıtıngi jarııalandy. Zertteý jumystaryn Bilim jáne ǵylym mınıstrliginiń tapsyrysy boıynsha «Atameken» Ulttyq kásipkerler palatasy júrgizgen. Reıtıngke IIM, UQK jáne Qorǵanys mınıstrligine baǵynyshty joǵary oqý oryndarynan basqa elimizdiń barlyq joǵary oqý orny qatysty, dep habarlaıdy Egemen.kz
Reıtıng nátıjesi boıynsha anyqtalǵan myqty ýnıversıtetterdiń ondyǵynda Akademııalyq adaldyq Lıgasynyń quramyndaǵy ýnıversıtetter de bar. Úzdik oqý oryndarynyń ondyǵy mynadaı:
M.S.Nárikbaev atyndaǵy KAZGUU Ýnıversıteti; Qazaqstan-Brıtan ýnıversıteti; KIMEP ýnıversıteti; Halyqaralyq aqparattyq tehnologııalar ýnıversıteti; Qazaqstan-Nemis ýnıversıteti; Súleımen Demırel atyndaǵy ýnıversıtet; L.N.Gýmılev atyndaǵy Eýrazııa ulttyq ýnıversıteti; Halyqaralyq bilim berý korporasııasy; Akademık E.A.Bóketov atyndaǵy Qaraǵandy ýnıversıteti; Narhoz ýnıversıteti.108 ýnıversıtet boıynsha 2 myńǵa jýyq bilim berý baǵdarlamasyn zertteý jumysyna 6 myń sarapshy qatysqan. Reıtıng joǵary oqý oryndarynyń artyqshylyqtaryn anyqtaý, bedelin kóterý jáne bilim berý sapasynyń ulttyq jáne halyqaralyq naryqta deńgeıin kóterýge baǵyttalǵan. Zertteý barysynda túlekterdiń jumysqa ornalasý kórsetkishteri, joǵary oqý oryndaryndaǵy bilim berý baǵdarlamalarynyń sapasy jáne bilim alýshylardyń jetistikteri eskerildi.
«Memleket basshysy Qasym-Jomart Toqaev 2020 jyly 27 mamyrda ótken Ulttyq qoǵamdyq senim keńesiniń úshinshi otyrysynda joǵary oqý oryndary arasynda básekelestikti damytý qajettigin atap ótti. Básekelestikti damytýdyń birden bir joly – qazaqstandyq joǵary oqý oryndarynyń bilim berý baǵdarlamalary naryqtaǵy suranysqa qanshalyqty saı keletinin anyqtaý, joǵary oqý oryndarynyń reıtıngin jasaý», dep habarlady Akademııalyq adaldyq Lıgasynyń baspasóz qyzmeti.