QR Parlamenti Senatynyń depýtattary Baqtybaı Shelpekov pen Súıindik Aldashev Mańǵystaý oblysyna jumys babyndaǵy sapar aıasynda Jańaózen qalasynda boldy. Senatorlar gaz-porshendi elektr stansııasy men qant zaýytynda jáne Jańaózen qalasynyń "Bilim-Innovasııa" lıseı-ınternatynda bolyp, «Munaıshy» mádenıet úıinde qala turǵyndarymen jáne bilim berý salasy qyzmetkerlerimen kezdesti.
Depýtattar ındýstrıaldy-ınnovasııalyq damý baǵdarlamasynyń aıasynda iske qosylǵan gazdy porshendi elektr stansııasyn aralady, stansııa ujymymen kezdesti, jańadan ashylǵan jumys oryndaryn kórdi jáne ekonomıkany ártaraptandyrý, ındýstrııalandyrý jáne otandyq taýarlardy syrtqy naryqqa shyǵarý máselelerimen tanysty.
Senatorlar kezdesýlerde Memleket basshysynyń halyqtyń ómir súrý deńgeıin jaqsartýǵa baǵyttalǵan tapsyrmalary boıynsha qabyldanǵan mańyzdy zańdar týraly habardar etti jáne osy baǵyttar boıynsha Parlament qabyrǵasynda atqarylyp jatqan sharalar týraly aıtyp berdi. Jańaózen qalasyndaǵy qant zaýytynyń eńbek ujymymen kezdesýde 2020 jyly Qazaqstanda qabyldanǵan jańa zańdar, olarǵa engizilgen túzetýler men tolyqtyrýlar týraly aıtylyp, qoıylǵan suraqtarǵa jaýap berdi.
"Bilim-Innovasııa" lıseı-ınternatynyń ustazdarymen kezdesý barysynda zańnyń is júzinde qalaı jumys istep jatqany týraly, onyń ishinde, pedagogtardyń qoǵamdaǵy bedeliniń kóterilýimen qatar olardyń eńbekaqysynyń ulǵaıýy týraly da aıtyldy.
Senatorlar «Munaıshy» mádenıet úıinde qala turǵyndarymen kezdesý barysynda Mańǵystaý oblysy Jańaózen qalasynyń ońtústigine taman 70 shaqyrymda ornalasqan «Kendirli» aımaǵyndaǵy Toqmaq jerinde sý tushytý zaýyty qurylysyn salý jospary týraly másele talqyǵa salyndy. Onyń Jańaózen qalasynyń áleýmettik-ekonomıkalyq damýy úshin asa mańyzdy ekendigi atap ótildi.