Tórtinshi ónerkásiptik revolıýsııa jaǵdaıynda ǵarysh ındýstrııasynyń alar orny erekshe. Ýaqyt jyljyǵan saıyn atalǵan sala qarqyn alyp, bul baǵyttaǵy izdenister adamzattyń aldyna jańa maqsat-mindetterdi aıqyndap berdi. NASA, SpaceX, Blue Origin jáne Rocket Lab syndy álemdik alpaýyttarmen jaryspasa da Qazaqstan ǵarysh salasyndaǵy qadamdaryn toqtaýsyz júrgizip keledi.
Adamzat ǵarysh keńistigine Qazaqstannyń jerinen attanǵanyn eskersek, bul elimiz úshin tyńnan túren salǵan sala deýge kelmes. Alaıda egemen el retindegi alǵashqy qadamdar 2000-jyldardyń basynda qolǵa alynǵanyn aıta ketken oryndy. Otandyq ǵarysh ındýstrııasynyń damý kezeńderi osy kezeńmen tikeleı baılanysty. Aıtalyq, 2004-2005 jyldary alǵashqy memlekettik baǵdarlamany iske asyrý maqsatynda negizgi salalyq kásiporyndar quryldy. Onyń ishinde «Qazaqstan Ǵarysh Sapary» UK» AQ-ny erekshe atap ótýge bolady. 2007 jyly Elbasynyń Jarlyǵymen Ulttyq ǵarysh agenttigi qurylyp, vedomstvo tóraǵasy Talǵat Musabaevtyń bastamasymen kompanııanyń ataýymen birge onyń tutastaı strategııalyq qurylymy ózgerdi. Naqty aıtqanda, ulttyq kompanııanyń mıssııasy aıqyndalyp, baǵyt-baǵdary belgilendi. Osylaısha, elordada zamanaýı ǵarysh tehnologııalaryna arnalǵan ınfraqurylymdy qurý boıynsha alǵashqy qadamdar jasaldy. Bul ıdeıa Jerdi qashyqtan zondtaý ǵarysh júıesin, dáldigi joǵary spýtnıktik navıgasııa júıesiniń jerústi ınfraqurylymyn, sol sekildi Ǵarysh apparattaryn qurastyrý-synaq keshenin qurýdy qamtıdy.
Saladaǵy aıtýly jańalyqtardyń biri – Ǵarysh apparattaryn qurastyrý-synaq kesheni (ǴA QuSK) qurylysynyń aıaqtalýy. Tehnologııalyq deńgeıi jaǵynan balamasy joq nysan sertıfıkattan ótip, bıyl ǵarysh apparattaryn qurastyrýdyń óndiristik sıkli iske qosylady dep josparlanýda. Osy keshen Ulttyq ǵarysh ortalyǵynyń basty nysanyna aınalady dep kózdelip otyr.
Ǵarysh apparattaryn basqarýda jerústi keshenderiniń mańyzy zor. Osy oraıda otandyq spýtnıkterdiń qalypty jumysyn qamtýda «Aqkól» baılanys ortalyǵynyń orny bólek. О́ıtkeni baılanys pen habar taratatyn Kazsat ǵaryshtyq júıesin qalyptastyrý isi dál osy jerústi ǵarysh ınfraqurylymynan bastaldy. Onyń jumysyn Respýblıkalyq ǵarysh baılanys ortalyǵy qadaǵalaıdy. «Aqkóldiń» qyzmetine telekommýnıkasııalyq spýtnıkterdiń tehnıkalyq jáne ballıstıkalyq sıpattamalaryn basqaryp baqylaý, sondaı-aq KazSat serııaly ǵarysh apparattarynyń paıdaly júktemesiniń monıtorıngi kiredi. Bul ǵarysh baılanys ortalyǵy elordadan 108 shaqyrym qashyqtyqta ornalasqan. 2008-2009 jyldary Kazsat-2 baǵdarlamasy men 2012-2013 jyldar kezeńinde KazSat-3 jobasy arqyly tehnıkalyq jańǵyrtý jumystary júrgizildi. Nátıjesinde «Aqkól» ITU Halyqaralyq elektr baılanys odaǵynyń spýtnıktik radıobaqylaý stansalarynyń biryńǵaı tizimine engizildi.
Qazir Respýblıkalyq ǵarysh baılanys ortalyǵy Kazsat-2 jáne KazSat-3 eki baılanys spýtnıginen turatyn Kazsat baılanys jáne habar taratatyn qazaqstandyq ǵarysh júıesiniń shtattyq jumysyn qamtamasyz etedi. Ǵarysh apparattaryn basqarý Aqmola oblysyndaǵy «Aqkól» negizgi jerústi kesheni men Almaty oblysyndaǵy rezervtik «Kókterek» ǵarysh baılanys ortalyǵynan júrgiziledi. Búginde Kazsat júıesiniń júktemesi shamamen 74%-dy quraıdy.
Kazsat baılanys spýtnıkteriniń qyzmetterin elimizdiń aýmaǵynda 13 myńnan astam spýtnıktik baılanys stansalary bar 15 otandyq baılanys jáne habar taratýshy operator paıdalanyp keledi. 2019 jyly ǵaryshtyq baılanys júıesin paıdalanýdan túsken jalpy tabys 29 mlrd teńgeden asyp, jyldyq ımportty almastyrý mólsheri 14,7 mlrd teńgege jetti. Memlekettik bıýdjetke 6 mlrd teńgeden asa jalpy salyq aýdaryldy.
Taǵy bir perspektıvaly jobalardyń biri – Kazsat-2R spýtnıgin ázirleý. Onyń boljamdy quny – 39,65 mlrd teńge.