Qazaqstan Pravoslav shirkeýiniń basshysy Astana jáne Qazaqstan mıtropolıti Aleksandr Qazaqstannyń Tuńǵysh Prezıdenti Nursultan Nazarbaevty «Alǵys» ordenimen marapattap, dinaralyq beıbitshilik pen ultaralyq kelisimniń nyǵaıýyna úles qosqany úshin alǵysyn bildirdi, dep habarlaıdy Egemen.kz Elbasynyń baspasóz qyzmetine silteme jasap.
«Siz eldiń gúldenýi úshin kóp eńbek ettińiz. Bastysy – dinaralyq beıbitshilik pen ultaralyq kelisim. Bul – adamdar yńǵaıly, jaıly, berekeli jáne jaqsy ómir súrý úshin memlekettiń damýyna múmkindik beretin tirek. Sizge kóptegen adamnyń atynan alǵys aıtamyn. Siz óz júregińizdi, bar kúshińizdi týǵan jerge qyzmet etýge arnadyńyz», dedi Astana jáne Qazaqstan mıtropolıti.
Nursultan Nazarbaev mıtropolıt Aleksandrǵa dinaralyq jáne etnosaralyq beıbitshilik pen kelisimdi saqtaý isindegi qyzmetine joǵary baǵa bergeni úshin alǵys aıtty.
«Táýelsizdik alǵan kúnnen bastap biz barlyq etnos arasynda dinı konfessııalardyń toleranttylyǵyn, dostyǵy men senimin nyǵaıtýdy óz saıasatymyz dep jarııaladyq. Turaqtylyq pen damý naq osy birlik pen dostyqta jatyr», dedi Qazaqstannyń Tuńǵysh Prezıdenti.