Ult múddesi – uly múdde

Prezıdent maqalasy elimiz júrip ótken otyz jyl ishindegi jetken je­tis­tikteri ǵana emes, jarqyn bolashaǵy týraly baısaldy taldaý jasaýymen de qoǵamdyq sanaǵa silkinis jasap, oqyrmanǵa oı saldy. Bizdiń zamandas­tar eki dáýirdi kórdi. Alǵash 90 jyldary Elbasymyz N.Á.Nazarbaev táýel­sizdigimizdi jarııalaý maqsatynda qazaq­tyń basyn qosyp, elimizdiń egemendigi jolynda eren eńbek etti. Oǵan tarıh kýá, biz kýámiz. Táýelsizdiktiń alǵashqy jyldary táı-táılap tusaýy jańa kesilgen Qazaqstan úshin ońaı bolǵan joq.

Memleket basshysy Q.Toqaevtyń «elimizdi aspen de, taspen de qorǵaımyz», degeni – batyl baılam! Prezıdenttiń táýelsiz memlekettigimizdiń tuǵyry – jer, til, mádenıet pen tarıh, el birligi men qundylyq máseleleri tóńireginde oıy kóńilge qonymdy. Til – Táýelsizdik tuǵyry! Osyny eskergen Memleket basshysy, barsha qazaqstandyqtarǵa, onyń ishinde qazaq tilin áli jete meńgermegen otandastarǵa úndeý tastady. «Jastar aǵylshyn tilin nemese basqa da tilderdi az ǵana ýaqytta meńgere alatynyn kórip otyrmyz. Tutas býyn almasqan osy jyldarda qazaq tilin úırengisi kelgen adam ony áldeqashan bilip shyǵar edi», dedi Prezıdent.

Maqalada Qazaqstannyń ósý jáne qalyptasý kezeńi jaqsy qamtylǵan. Bizdiń Táýelsizdigimizdiń – eń úlken qundylyǵy tarıhı tamyry tereńde ekeni ras. Búkil álem aýmaqtyq tutastyǵymyzdyń halyqaralyq sharttarmen bekitilgenin Memleket basshysynyń óz aýzynan estidi. Maqalada Kaspıı konvensııasy týraly da aıtylǵan. 2018 jyly biz Kaspıı teńizi jaǵalaýynda ornalasqan memleketter arasyndaǵy teńiz shekarasy bólinýine qatysty uzaqqa sozylǵan daýly máseleni sheshtik. О́z múddemizdi qorǵaý turǵysynan alyp qaraǵanda, bul bizdiń memleketimizdiń úlken jeńisi deý­ge bolady.

Ekologııalyq máseleler tóńireginde aıtylǵan keıbir nárselerdi zańmen qadaǵalaý qıyn. Ol qoǵamda adamdardyń mádenıetine, óskeleń urpaqtyń tárbıesine baılanysty týyndaıdy. Bala kezden bas­tap tabıǵatty aıalaýdy úıretý qajettigi óte oryndy aıtylǵan. Odan ári ýaqyt uttyrmaı qolǵa alyp, dáıekti túrde iske asyratyn taǵy bir sharýa, shekara mańyndaǵy eldi mekenderde turǵyndar sany kúrt azaıyp ketýine baılanysty qandastar kóshin jańǵyrtý qajettigin atap, halyq tyǵyzdyǵy árkelki Qazaqstan aımaqtary úshin bul eńbek kúshin tıisti deńgeıde saqtap turýǵa, demografııalyq ahýaldy jaqsartýǵa múmkindik beretin erekshe mańyzy bar naýqan ekenin qaperge salady.

Memleket basshysy Q.Toqaev Táýel­siz­diktiń otyz jylyn shartty túrde úsh onjyldyq beleske bólip qaras­tyrǵan. Ár onjyldyq atqarǵan mıssııa­sy turǵysynan ǵasyrdyń júgin arqa­lap tur deı kele, aldaǵy tórtinshi onjyl­dyqtyń da bizge júkteıtin júgi aýyr ekenin, ol úshin ulttyń jańa bolmysyn qalyptastyrý qajettigin eskertedi.

Ras, Táýelsizdik bárinen qymbat. Táýelsizdik qundylyǵy jadyna birjola shegelenip, máńgi saqtalýy úshin óskeleń urpaq onyń qadirin bilýi kerek.

Qazaqstannyń Tuńǵysh Prezıdenti – Elbasy «Táýelsizdik bizge ulttyq, aımaqtyq jáne jahandyq ólshemde sheksiz jaýapkershilik júgin artty», degen edi. Árıne, ulttyq sanany tarıhı sana qalyptastyrady. Tarıhyn tereń bilgen, tarıhtan taǵylym alǵan ult táýelsizdiktiń tegin kelmegenin uǵynady. Bul rette Elbasynyń «Mádenı mura», «Rýhanı jańǵyrý» syndy keshendi baǵdarlamalar jasaý arqyly tarıhı sanamyzdy jańǵyrtýǵa rýhanı negiz, derektemelik baı qor jasap, taptaýryn qııas túsinikterden sanamyzdy azat etkenin aıtqan. Prezıdent tarıhshylarǵa otandyq akademııalyq úlgidegi jańa tarıh jazýdy, sol arqyly urpaqqa uǵynyqty, qarapaıym tilmen ótkenimizdi nasıhattaý, kórkem jáne derekti fılmderdi kóbeıtý sekildi tapsyrmalar berýi – ýaqyt sozbaı sheshimin tabýǵa tıisti ózekti másele ekeni aıqyn baıqalady.

Prezıdent maqalasynda ótkenimizge baǵdar jasap, bolashaqqa tyń josparlar usynǵan, jańa ıdeıalar men usynystar aıtqan. Memlekettigimizdiń jańa tarıhı kezeńindegi Qazaqstan Prezıdentiniń maqalasy bolashaqtyń baǵdarlamasyn qalyptastyratyn qýatty ıdeologııalyq negiz bolatyndyǵy aıdan anyq.

Baqtyqoja IZMUHAMBETOV,

Respýblıkalyq «Ardagerler uıymy» Ortalyq keńesiniń tóraǵasy