Almaty Aýmaqtyq saılaý komıssııasynyń tóraıymy Janna Asanova qalalyq ýchaskelerdiń birinde saılaý jáshigine bıýlletenderdi artyǵymen salý týraly aqparatty joqqa shyǵardy, dep habarlaıdy Egemen.kz
Esterińizge sala keteıik, buǵan deıin belgili saıtta saılaý ýchaskeleriniń birinde saǵat 12:00 shamasynda ájeıdiń saılaý jáshigine bes nemese segiz dana bıýlleten salǵany aıtylǵan bolatyn.
«Atalǵan saıttyń jýrnalısti óreskel quqyqbuzýshylyqty tirkep, kommentarııde fotoaıǵaqty keltirgen. Biz tez arada jaǵdaıdy qarastyra bastadyq. Birinshiden, Almaty qalasynda mundaı kabınalar joq, bizdegi kabınalar jińishke, ashyq kógildir tústi perdelermen jabdyqtalǵan. Ekinshiden, saılaý ýchaskesiniń beınesi shyndyqqa janaspaıdy, óıtkeni fotodaǵydaı stendter aldynda perde joq», dep túsindirdi Janna Asanova.
О́ńirlik saılaý komıssııasynyń tóraıymy saılaý prosesinen aqparat taratyp jatqan jýrnalısterdi abaı bolýǵa shaqyrdy.
«Saıtta ornalastyrylǵan fotosýret shyndyqqa janaspaıdy. Jalǵan aqparat dep tolyq senimmen aıtýǵa bolady. Sonymen qatar, atalmysh saılaý ýchaskesinde orda.kz tilshileri bolǵan joq, olar, tipti, saılaý prosesine qatysýshy retinde tirkelmegen. Men bul saıtqa aqparat bógde derekkózderden túsken dep oılaımyn, sondyqtan saılaý prosesiniń barlyq qatysýshylaryna, almatylyqtarǵa aqparatty taratpas buryn onyń shynaıylyǵyna kóz jetkizýińizdi suraımyn. Bul jaǵdaı bolmaǵan oqıǵany boldy dep, jalǵan aqparatty senimdi faktige qalaı aınaldyrýǵa bolatynyn kórsetedi. Sondyqtan, áriptester, ásirese, jýrnalıster aldaryńyzǵa qandaı aqparat kelmesin birinshi tekserip alýdy daǵdyǵa aınaldyrsańyzdar. Mundaı keleńsizdikter sizdiń de, bizdiń de bedelimizge nuqsan keltirmek. Bizdiń saılaýshylar aldyndaǵy jaýapkershiligimiz – barlyǵyna senimdi aqparat berý», dep qorytyndylady Janna Asanova.