Táýelsizdik alǵan 30 jyldyń ishinde memlekettik bıliktiń qyrýar sharýa atqarǵany, halyq turmysynyń jaqsaryp, ilgerilegeni ras. Ony joqqa shyǵarýǵa bolmaıdy. Degenmen osy ýaqytta halyqtyń talǵamy, joǵary bılikke qoıatyn talaby da ósti. Osyndaı óskeleń elge halyq talabynan shyǵatyn qalaýlylar kerek, dep habarlaıdy Egemen.kz
О́kinishke qaraı, qazir halyqtyń osy talǵamy men talabynan bizdiń bılik oryndary da, saılanbaly organdar da tolyq shyǵyp turǵan joq. Ásirese depýtattar óz mindetin tolyǵymen atqaryp otyr dep aıtýdyń ózi artyq. Sondyqtan búgingi saılaýdan kútetin úmit kóp. Qoǵamnyń árbir múshesi ata-baba qasıetine tán adaldyq, mádenıetti, qoǵamdy alǵa bastyratyn, tulǵasyna qarap boı túzeıtin jandardyń halyq sózin ustaǵanyn qalaıdy. Parlamentte, máslıhattarda oıy da, soıy da bıik, sózi de, isi de iri, qoly men júregi taza adamdar otyrsa degen úmitim bar.
Onyń ústine bıyl tuńǵysh ret qoǵamdyq uıym retinde kásipodaq músheleri saılaý naýqanyna baqylaýshy retinde qatysyp jatyr. Bizdiń salalyq mádenıet, sport, týrızm jáne aqparat qyzmetkerleri kásipodaq uıymynyń ózinen Batys Qazaqstan oblysynda 40 shaqty baqylaýshy búgin saılaý ýchaskelerinde otyr. Elimizdiń erteńgi kúnine erekshe yqpal etetin saıası naýqannyń uıymshyldyqpen ótýin tileımin.