Memleket basshysy ál-Farabı atyndaǵy Oqýshylar saraıynda ornalasqan saılaý ýchaskesine baryp, Qazaqstan Respýblıkasy Májilisi men jergilikti máslıhattar saılaýynda óz tańdaýyn jasady, dep habarlaıdy Egemen.kz Aqordanyń baspasóz qyzmetine silteme jasap.
Prezıdent qazaqstandyq jáne sheteldik buqaralyq aqparat quraldary úshin uıymdastyrylǵan brıfıngte Parlament saılaýy árbir eldiń ómirindegi asa mańyzdy oqıǵa ekenin atap ótti.
– Bul saılaý memleketimizdiń odan ári damýyna serpin beredi. Jalpy bizdiń Parlamentke neǵurlym kóp partııa kirse, elimizdiń bolashaǵy úshin de soǵurlym jaqsy bolady. Sondyqtan saılaý ádil ótedi dep senemin. Parlamenttiń negizgi mindeti sapaly zańdar qabyldaý. Qazaqstanǵa sapaly zańnama júıesi qajet. Sol sebepti bárimiz osy múmkindikti paıdalanyp daýys berýimiz kerek, – dedi Qasym-Jomart Toqaev.
Jýrnalıster eń aldymen Prezıdenttiń saılaýǵa qandaı kóńil-kúımen kelgenin, qaı partııaǵa daýys bergenin surady.
– Kóńil-kúıim óte jaqsy. Halqymyz belsendi túrde daýys berip jatyr. Biz Qazaqstannyń bolashaǵy, elimizdiń damýy úshin daýys berdik. Parlamentte elimizdiń keleshegi, halqymyzdyń taǵdyry jaıynda keń aýqymdy pikirtalastar bolýy kerek, – dedi Prezıdent.
BAQ ókilderin Qasym-Jomart Toqaevtyń saılaýdan ne kútetini, qandaı úmit artatyny qyzyqtyrdy.
– Bul saılaý elimizdegi demokratııany damytýǵa jasalǵan taǵy bir qadam bolýy kerek. Ár saılaý – azamattyq qoǵamnyń ilgerilegenin kórsetetin synaq. Bizdiń Parlamentimizde ártúrli partııalar bolatynyna úlken úmit artamyn, – dedi Memleket basshysy.
Jýrnalıster Prezıdentten saılaýaldy úgit-nasıhat naýqanynyń qanshalyqty básekege saı ótkeni týraly surady.
– Halqymyzdyń azamattyq belsendiligi óte joǵary. Úmitkerler óte kóp. Barlyǵyna teń múmkindik jasaldy. Jalpy alǵanda, saılaý joǵary deńgeıde, zańnamaǵa sáıkes ótip jatyr. Qandaıda da bir zań buzýshylyqtar tirkelgen joq. Biz bárin muqııat baqylap otyrmyz. Bul saılaý bárimizge, ásirese, azamattyq qoǵamǵa úlken synaq. Sondyqtan saılaý jaqsy ótedi dep oılaımyn, – dedi Qasym-Jomart Toqaev.
Brıfıng barysynda Memleket basshysy reformalardyń kezekti paketi ázirlenip jatqanyn aıtty.
– Reformalar daıyndalyp jatyr. Ol toqtamaýy kerek. 15 qańtarda Parlamentte depýtattardyń jańa quramynyń aldynda sóıleımin. Odan keıin Ulttyq qoǵamdyq senim keńesiniń otyrysynda aldaǵy reformalar jaıy jan-jaqty talqylanady, – dedi Prezıdent.
Jýrnalıster Qasym-Jomart Toqaevtan bolashaqta Úkimette bolatyn aýys-túıister týraly pikirin surady.
– Bizdiń zańnamaǵa sáıkes, Úkimet otstavkaǵa ketýi kerek. Saılaýdan soń Parlamentte jańadan saılanǵan depýtattarmen jáne fraksııa jetekshilerimen Premer-Mınıstrdiń, Úkimet músheleriniń quramy jóninde aqyldasamyn, – dedi Memleket basshysy.